Մարտի 18-ին Իջեւան քաղաքում կայացած նախընտրական հանդիպման ժամանակ ելույթ ունենալով՝ ՀՀ արդարադատության նախարար Արփինե Հովհաննիսյանը հայտարարեց. «Մեր ուշադրության կենտրոնում միշտ գտնվում եւ գտնվելու են սահմանամերձ համայնքների խնդիրները: Այն համայնքների, որոնք իրենց ամենօրյա գործունեության մեջ զգում են թշնամու, հակառակորդի ներկայությունը: Եվ ներկայությունը զգում են ոչ միայն իրենց կենցաղի վրա, այլ նաեւ այդ ներկայությունը ուղղակի նկատվում է տարբեր ոլորտներում եւ խնդիրների մեջ: Եվ ես մի քանի մեր ծրագրերից եմ ուզում խոսել, որոնք ուղղակիորեն վերաբերում են այս կամ այն ոլորտին:
Առաջին հերթին գիտեմ, որ էստեղ օրինակ Բերդ-Երեւան մայրուղու ճանապարհահատվածը գտնվում է բավականին բարդ վիճակում, որովհետեւ ենթարկվում է հակառակորդի ռմբակոծություններին: Գիտեմ, որ շրջանցիկ ճանապարհը անբարեկարգ է,եւ դրա համար ուզում եմ ձեզ այսօր ասել, որ մեր ամենօրյա ծրագրերի մեջ ներառված են մի քանի ճանապարհահատվածների հիմնանորոգման աշխատանքներ: Խոսքը վերաբերում է առաջին Բերդ-Այգեձոր-Չինարի հատվածին, Մովսես-Չորթան (պետք է լինի Չորաթան, ծանոթ.՝ Ո.Ս.-ի) –Նորաշեն հատվածին, ինչպես նաեւ Այգեհովիտ-Վազաշեն-Պառավաքար-Այգեձոր հատվածներին: Ուզում եմ ասել ձեզ,որ ծրագիրը խոստումից տարբերվում է հենց դրանով, ծրագիրը նշանակում է՝ գիտենք ինչպես եւ ոնց ենք անելու: Խոստման ժամանակ ընդամենը ձեր ականջն ենք շոյելու մինչ այն պահը, երբ մի օր հնարավոր պետք է լինի, դառնա այդ խոստման ծրագիր դարձնելը»:
Նշենք, որ Բերդ-Այգեձոր-Չինարի հատվածը այժմ երթեւեկի համար բարեկարգ է, իսկ Այգեձորը հարեւան չէ Պառավաքարին, այն Պառավաքարից մեծ հեռավորությամբ է գտնվում: Ա. Հովհաննիսյանը Այգեձոր գյուղի անունը հայտարարելուց առաջ որոշ դադար տվեց, հավանաբար, նա շփոթմամբ նշեց Այգեձորը:
Կարդացեք նաև
Ոսկան ՍԱՐԳՍՅԱՆ
