Լոռու մարզի Տաշիր քաղաքում նախընտրական հավաքի ժամանակ ՀՀԿ առաջին փոխնախագահ, ՀՀ վարչապետ Կարեն Կարապետյանի հետ հանդիպմանը բնակիչներից մեկը նրան խնդրանքով դիմեց: «Ովքեր հաղթանակով են պատերազմից վերադարձել, խնդրում եմ հարգել նաեւ նրանց: Ամուսինս՝ Էդիկ Սոնոյանը (հագել եմ նրա զինվորական համազգեստը), պարգեւատրվել է «Վազգեն Սարգսյան», «Գարեգին Նժդեհ» մեդալներով, բայց ստանում է երկրորդ կարգի հաշմանդամի թոշակ, որը չի բավականացնում կոմունալ ծախսերը վճարելու համար: Խնդրում եմ, որ նրա թոշակը դառնա զինվորական, որ կարողանա իր ընտանիքի վիճակը բարելավել»,-ասաց զինվորական համազգեստով տիկինը:
Նաեւ նշեց, որ եղբորորդին սովորում է Բժշկական համալսարանում. «Խնդրում եմ՝ աջակցեք, որ կարողանա ավարտել»: Կարեն Կարապետյանը կնոջ առաջին խնդրանքին այսպես արձագանքեց. «Եթե Ձեր ամուսնուն հասնում է ուրիշ թոշակ, հարցը կքննենք: Եթե չի հասնում ու բավարար չի, այնպիսի վիճակ ստեղծենք, որ թոշակներն ավելանան…»:
Ուսանող-եղբորորդու առնչությամբ էլ վարչապետը խորհուրդ տվեց նամակ հանձնել Կրթության նախարարությունը. «Վերջինս կարձագանքի, եթե դրա հնարավորությունը կա»:
Լուիզա ՍՈՒՔԻԱՍՅԱՆ
