Այսօր լրագրողները «Հայացք» ակումբում «Ծառուկյան» դաշինքի անդամ Արարատ Զուրաբյանից հետաքրքրվեցին՝ այնուամենայնիվ, ձեզ ի՞նչը տարավ «Ծառուկյան» դաշինք, ինչ-որ գաղափա՞ր տարավ՝ նա պատասխանեց, որ քաղաքական գործունեությունը անշնորհակալ գործունեություն է, եթե դու սկզբունքային ես, մշտապես ստանում ես հարվածներ, լինում ես հետապնդված. «Ես բազմիցս հայտնվել եմ բանտում, ԱԱԾ մեկուսարանում, եղել են պրոցեսներ, որ ծանր են անդրադարձել իմ, իմ բարեկամների վրա, իմ ոչ մի բարեկամ, ընկեր աշխատելու իրավունք չի ունեցել ոչ մի պետական մարմնում: Ինչը ինձ տարավ՝ ասեմ, եթե նայեք Ծառուկյանի դաշինքի ներկայացված ծրագիրը, այնտեղ դրույթ կա, մեր գործունեությունը ուղղված է լինելու մարդու արժանապատվությունն ապահովելուն, լիբերալիզմի հիմքն է դա»:
Նա ասաց, որ Ծառուկյանի հետ երբ քննարկել են, իր համար համոզիչ է եղել, որ կարող են իրականացնել լուրջ ծրագրեր. «Կարելի էր առանձին մասնակցել կուսակցությամբ, գնալ եւ արձանագրել, որ մենք եւս մեկ անգամ մասնակցեցինք, բայց չհաջողվեց, սպասեք եւս մի հինգ տարի, կփորձենք մեր ծրագրերը իրականացնել: Բայց այդ ճանապարհով մենք բավականին երկար ժամանակ ենք անցել: Սա ավելի ճիշտ ընտրություն էր: Եթե իմ պատկերացրած ճանապարհով այս ամեն ինչը չընթանա, ես դուրս կգամ, մանդատը վայր կդնեմ, իմ համար ինքնանպատակ չի եղել դա»:
Արարատ Զուրաբյանն ասաց, որ եթե ենթադրենք, որ ՀՀԿ-ի թեկնածուն նախագահի ընտրություններին լավագույն դեպքում հավաքել է 51-52 տոկոս: Սա նշանակում է, որ հասարակության պաշտոնապես արձանագրված 48-49 տոկոսը ընդդիմացել է իշխանության գծին եւ իրենց թեկնածուին. «Սա պաշտոնական տվյալն է՝ հասարակության 49 տոկոսը դեմ է գործող վարչակարգին: Թե ինչ աստիճանի են եղել խախտումները, դուք գնահատեք եւ կտեսնեք իրական վարկանիշը իշխանություն ներկայացնող թեւին: Եթե ռեալ ընտրություններ լինեն՝ առանց խախտումների, ապա ներկայիս իշխանությունը լավագույն դեպքում բոլոր ռեսուրսներով կհավաքի 20-25 տոկոսից ոչ ավելի՝ եթե շատ ծավալուն ընտրախախտումների չգնա»:
Հռիփսիմե ՋԵԲԵՋՅԱՆ
