Մայիսի 5-ին Արամ Խաչատրյան համերգասրահում տեղի կունենա հանրահայտ թավջութակահար Նարեկ Հախնազարյանի և Գայանե Հախնազարյանի բարեգործական համերգը։ Համերգից ստացված ամբողջ հասույթը նվիրաբերվելու է Կոշի մանկական վերականգնողական կենտրոնին։
Մանկական կենտրոնի տնօրեն Զավեն Քոլոյանը նշեց որ կենտրոնը բացվել է 2013 թվականին` բարեգործական կազմակերպությունների շնորհիվ։ Օրական 23 երեխա վերկանգնողական բուժում է ստանում․ «Ամեն առավոտ մենք երեխաներին իրենց բնակության վայրերից մեքենաներով բերում ենք կենտրոն և այնպես է կազմակերպված, որ յուրաքանչյուր երեխա մեկ օրվա ընթացքում առնվազն երեք թերապիա է անցնում, 2 անգամ էլ սնունդ է տրվում»,- պատմեց Զավեն Քոլոյանը։
Նարեկ Հախնազարյանն էլ, պատմելով իրենց համագործակցության մասին, ասաց, որ բոլորովին պատաբար է բացահայտել այս կենտրոնը։ Կոշի մանկական կենտրոնի բարեգործներից մեկը երաժշտի ծանոթն է եւ հանդիպման ժամանակ պատմել է կենտրոնի գործունեության մասին։ Թավջութակահարը մանկական վերականգնողական կենտրոն այցելելուց հետո որոշել է, որ ինքն էլ պետք է իր աջակցությունը ցուցաբերի։ Նարեկը նշեց, որ չի հիշում, թե երբ է վերջին անգամ Հայաստանում համերգ տալով գումար աշխատել․«Ինձ համար Հայաստանը ոչ թե այն տեղն է, որտեղ ես պետք է գումար վաստակեմ, այլ այստեղ ես պետք է իմ լուման ներդնեմ նրա զարգացման համար ու աջակցեմ զանազան հիմնադրամներին, որոնք զբաղվում են տարբեր խնդիրների լուծմամբ։ Ես համագործակցում եմ նաև «Նվիրիր կյանք» հիմնադրամի հետ և վերջին մի քանի համերգների հասույթը տրամադրվել է այդ ֆոնդին»։
Ներկայացնելով համերգային ծրագիրը` Գայանե Հախնազարյանը նկատեց, որ նրանք աշխատել են ծրագրում ընդգրկել տարբեր կոմպոզիտորների ստեղծագործություններ, որպեսզի նույնատիպ չլինի և յուրաքանչյուր ունկնդրի հաճելի լինի։ Համերգային ծրագրում ընդգրկվել են Բեթովեն, Շուբերտ, Շոպեն, Շոստակովիչ, Մասնե, Շուման։ Նարեկ Հախնազարյանը առաձնահատուկ նշեց, որ համերգին լինելու է համաշխարհային պրեմիերա՝ նա նվագելու է Էդվարդ Հայրապետյանի «Մոնոլոգ» ստեղծագործությունը։
Կարդացեք նաև
Լիլի Խաչատրյան
