«Այսօր հայտարարում ենք մի նախաձեռնության մասին, որը պայմանավորված է մեր երկրի առաջ ծառացած խորը քաղաքական իրավիճակով և բարոյական ճգնաժամով։ Մի խումբ հայրենասեր և ազնիվ քաղաքացիներ, որոնք ներկայացնում են տարբեր քաղաքական ուժեր, հայտարարում են «Սկզբունք» նոր համահայկական քաղաքական շարժման ստեղծման մասին։ Այս շարժման նպատակն է խաղաղ, արժանապատիվ հեղափոխության միջոցով հեռացնել Նիկոլ Փաշինյանի իշխանությունը, որը վարում է ապօրինի, հակասահմանադրական և հակահայկական գործունեություն»,- «Սկզբունք» շարժման ստեղծմանը նվիրված մամուլի ասուլիսի ժամանակ հայտարարեց «ՆԺԱՐ» սահմանադրական շարժման համահիմնադիր Արտաշես Իկոնոմովը։
Արտաշես Իկոնոմով
Նա ահազանգեց՝ վերջին տարիներին ՀՀ-ում տեղի ունեցող գործընթացները հանգեցրել են նրան, որ պետական իշխանությունը դարձել է ամենահակահայկականը, ամենաանարդարն ու անպատասխանատուն․ «Այսօր ՀՀ-ում ձևավորվել է մի իրավիճակ, երբ իշխանությունը ոչ միայն չի արտահայտում ժողովրդի մեծամասնության կամքը, այլև ակտիվորեն ոչնչացնում է ընդդիմությանը՝ սպառնալիքներով, բանտարկություններով, խուլիգանական, հակասահմանադրական վարքով ընդդեմ հայ առաքելական եկեղեցու»։
Նա կոչ արեց բոլոր ընդդիմադիր ուժերին, հայրենասեր քաղաքացիներին՝ ներառյալ սփյուռքից, միավորվել և դառնալ մեկ բռունցք, որը կկանգնեցնի այս ավերիչ ընթացքը։
Կարդացեք նաև
Արտաշես Իկոնոմովը հայտնեց, որ այս պահին «Սկզբունք» շարժման անդամներն են «Առաջ», «Զարկերակ» և «ՆԺԱՐ» քաղաքական միավորների առաջնորդները․ «Մենք ձևավորելու ենք ժամանակավոր անցումային կառավարություն, որը պետք է ղեկավարի երկիրը Փաշինյանի հեռացումից հետո՝ 360 օրով։ Երկու ամսվա ընթացքում միավորված ընդդիմության անունից այն կձևավորվի, և կներկայացվեն կառավարության բոլոր անդամների անունները։ Այս ժամանակավոր կառավարությունը պետք է կազմակերպի ու անցկացնի հանրաքվե շարժման կողմից մշակված սահմանադրության տեքստի վերաբերյալ։ Այն կապահովի օրինականության և կարգուկանոնի վերականգնումը, ազատ կարձակի քաղբանտարկյալներին, կդադարեցնի քաղաքական հետապնդումները, կնախապատրաստի արտահերթ խորհրդարանական ընտրություններ՝ արդար ու թափանցիկ ընտրական գործընթացի միջոցով»։
«Սկզբունք» շարժման ստեղծմանը նվիրված մամուլի ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
