«Ազերիները եւ թուրքերը շատ դրամ կդնեն, հայ անունը չգործածելու համար: Երեք ամիսը մեկ երեսփոխաններ կտանեն Ադրբեջան, կհարգեն, կպատվեն, ինչու ոչ, գրպաններն էլ լիքը կվերադարձնեն»,- այսօր «Հայք» վերլուծական կենտրոնում հրավիրված մամուլի ասուլիսում իր մտահոգությունները բարձրաձայնեց ՌԱԿ ատենապետ Սերխիո Նահապետյանը: Ըստ նրա, ադրբեջանցիները հատկապես ակտիվ են աշխատում այն երկրներում, որտեղ հայկական գաղութներն ուժեղ են: «Մենք պետք է մեր երիտասարդներին ներգրավենք եւ ակտիվ աշխատենք այդ ամենի դեմ: Մենք պետք է բոլոր կառավարությունների մեջ մարդ ունենանք, որպեսզի մեր դաստիարակությունը ամենօրյա լինի»,- ասաց նա:
ՌԱԿ ատենապետը, ի դեպ հայտնվել է Ադրբեջանի «սեւ ցուցակում»`Արցախ այցելելու համար: Նա վստահ է, որ Սփյուռքն այսօր իր ուժերը պետք է կենտրոնացնի Արցախի ճանաչման ուղղությամբ, իսկ Հայաստանի կառավարությունը պետք է ուղղություն տա:
2006 թվականի ապրիլի 26-ին Արգենտինայի Բուենոս Այրես նահանգի ներկայացուցիչների պալատը միաձայն քվեարկությամբ ճանաչեց Հայոց ցեղասպանությունը: Ընդունված օրենքի համաձայն՝ ապրիլի 24-ը հետայսու սահմանվեց որպես 20-րդ դարում առաջին Ցեղասպանության Հիշատակման օր, որին զոհ դարձավ հայ ժողովուրդը: Օրենքի ընդունումն իրականացվել է Բուենոս Այրես նահանգի ներկայացուցիչների պալատի պատգամավոր, մեր հայրենակից Սերխիո Նահապետյանի համառ ջանքերով:
Իր օրինակի վրա պարոն Նահապետյանը պնդում է, որ իր համար թեեւ բարդ էր 94 պատգամավորի ստորագրություն հավաքել, բայց նաեւ դյուրին: «97 տարի միշտ ձգտել են սրան ու միշտ, վերջին քայլը երբ պիտի արվեր, կասեին`թուրք դեսպանը եւ այլն: Բայց պետք է ուզենալ եւ աշխատել ու դա հնարավոր կդառնա: Ընտանիքդ, բարեկամներդ պիտի ձգես, ամեն օր ժողովրդի հետ շփվես, աշխարհին նայես, ուրիշների հետ շփվես: Սա մեծ եւ դժվար գործ է, բայց պիտի անենք: «Մի խառնվիր տղաս, ամենու հետ լավ եղիր որ վրադ չհարձակին» մտայնությունները պիտի ձգենք: Վախը պետք է հանենք մեջներուցս, այլապես աշխարհը մեր դեմ պիտի աշխատե»,- ասաց բանախոսը:
Մանրամասները` տեսանյութում
ՌԱԿ ԿՎ անդամ Հրայր Հովիվյանն էլ կարծում է, որ Արցախի անկախ հանրապետության ճանաչումը կարեւոր է. «Այն, ինչը չի կարող կատարել Հայաստանի պետությունը Արցախի ճանաչման հարցում, սփյուռքահայերի լուծելիք հարցն է: Նաեւ իրավունքներ չունեցող փախստականների իրավունքների պաշտպանության առումով: Սա պետք է լինի գլխավոր առաքելությունը սփյուռքի»:
Նելլի ԳՐԻԳՈՐՅԱՆ
