Վրաստանում ադրբեջանցի լրագրողի առևանգումը և Ադրբեջանում նրա ձերբակալությունը պահանջում է արագ, մանրակրկիտ ու թափանցիկ հետաքննություն: Այս մասին ասվում է ԵՄ արտաքին հարաբերությունների հանձնաժողովի խոսնակ Մայա Կոսիյանչիչի տարածած հաղորդագրության մեջ:
ԵՄ-ը նաև ողջունել է Վրաստանում այդ գործով սկսված հետաքննության մեկնարկը:
«Ադրբեջանի կողմից հիմնարար իրավունքների, այդ թվում խոսքի ազատության հետ կապված սահմանափակումների վերանայումը, և դրանց հետ կապված բոլոր ձերբակալվածների ազատ արձակումը հրատապ է՝ համաձայն Ադրբեջանի միջազգայնորեն ստանձնած հանձնառությունների»,- ասվում է հայտարարության մեջ:
ԵՄ խոսնակը հույս է հայտնել, որ կապահովվի անհրաժեշտ իրավական գործընթաց, ինչպես նաև կհարգվեն քաղաքացիների քաղաքական ու քաղաքացիական իրավունքները:
Հայտարարության մեջ հիշեցվում է, որ Մարդու իրավունքների միջազգային հռչակագիրը հստակ փաստում է, որ «ոչ մեկը չի կարող ենթարկվել կամայական ձերբակալության, կալանքի և արտաքսման»:
Հիշեցնենք, ավելի վաղ հաղորդվում էր, որ Վրաստանում առևանգվել է ադրբեջանցի ընդդիմադիր լրագրող Աֆգան Մուխթարլին, տեղափոխվել է Ադրբեջան և այնտեղ ձերբակալվել:
Պատրաստեց՝ Վիկտորյա ԱՆԴՐԵԱՍՅԱՆԸ
