«Սպառողների ազգային ասոցիացիայի» նախագահ Մելիտա Հակոբյանը կարծում է, որ բրուցելոզի դեպքերի կրկնման հիմնական պատճառն այն է, որ հակահամաճարակային գործողությունները պատշաճ չեն կատարվում:
«Հայելի» ակումբում լրագրողների հետ հանդիպմանը տիկին Հակոբյանը փաստեց, որ այժմ գործ ունենք բրուցելոզի էնդեմիկ` տեղայնացված պրոցեսների հետ:
Համեմատելով, թե ինչպես էին խորհրդային տարիներին իրականացնում հակահամաճարակային գործողություններ, նա ասաց. «Երբ հայտնաբերվում էր բրուզելոզի էնդեմիկ օջախ, այդ անասնագոմը պետք է դեզինֆեկցվեր, հետո 6 ամիս չէին թողնում այնտեղ անասուն պահել, որ բրուցելոզի հարուցիչը չփոխանցվեր: Մյուս անասուններին թույլ չէին տալիս մտնել այն արոտավայրերը, որտեղ բրուցելոզով հիվանդ անասուններ են եղել: Բայց հիմա նման միջոցառումներ չեն իրականացվում, դրա համար էլ անընդհատ բրուցելոզի դեպքերը կրկնվում են»:
Տիկին Հակոբյանը նկատեց, որ այս հարցում երբեմն նաև գյուղացիների մեղավորությունը կա, քանի որ գումար չունենալու պատճառով անասուններին ժամանակին չեն պատվաստում:
Մարկետոլոգ Ռուբեն Հայթյանի համոզմամբ` թերացումը ՀՀ Գյուղատնտեսության նախարարության համակարգում անասնաբուժության, անասնաբուծության ծառայությանն է. «Եթե այս փոքրիկ երկրում բրուցելոզի հաճախակի բռնկումներ են լինում, ուրեմն այդ կառույցն է թերանում, ուրեմն անասնաբուծությունը բավարար մակարդակի վրա չէ»:
Տաթև ՀԱՐՈՒԹՅՈՒՆՅԱՆ
