Սրտի իշեմիկ հիվանդության առավել տարածված ձեւերից է ստենոկարդիան, որի պատճառը աթերոսկլերոզի հետեւանքով սրտի պսակաձեւ զարկերակների լուսանցքի սեղմումով, անոթների կծկանքով կամ դրանց զուգակցումով պայմանավորված՝ սրտամկանի անբավարար արյունամատակարարումն է: Նման դեպքերում լինում է լարման ստենոկարդիա, որի նոպաները հաճախ առաջանում են արագ քայլելիս, սար բարձրանալիս եւ դադարում են կանգ առնելիս: Ստենոկարդիայի նոպաներ առաջանում են նաեւ ծխելուց, ալկոհոլ գործածելուց, շատ ուտելուց: Հազվադեպ են հուզմունքի հետեւանքով առաջացող լարման նոպաները:
Ստենոկարդիայի նոպաները կանխելու համար նախ պետք է խուսափել ցավ առաջացնող ֆիզիկական բեռնվածությունից եւ նյարդային լարվածությունից, բայց եւ խորհուրդ չի տրվում լիարժեք հանգիստը, թույլատրելի են որոշ ֆիզիկական բեռնվածություններ: Պետք է սնվել փոքր բաժիններով, քանի որ շատ ուտելը կարող է դառնալ ստենոկարդիայի նոպայի պատճառ:
Բուսաբուժությունը ստենոկարդիայի ժամանակ ունի բազում օգտակար միջոցներ, որոնք ոչ միայն հանգստացնող, այլեւ բուժող հատկություն ունեն:
1. Վերցնել հավասար քանակությամբ չամիչ, ծիրանի չիր, սեւ սալորի չիր, ընկույզ, 1 հատ կիտրոն: Աղալ մսաղացով եւ ավելացնել 300 գրամ մեղր: Ուտել ամեն առավոտ՝ սոված փորին, մեկական ճաշի գդալ:
2. Հավասար քանակությամբ սխտոր, մեղր եւ կիտրոն խառնել իրար եւ 7 օր դնել սառնարանում: Օրական 1 անգամ խառնել: Օգտագործել օրական 3 անգամ՝ մեկական ճաշի գդալ, ուտելուց հետո:
3. 2 ճաշի գդալ չորացրած արեւքուրիկի վրա ավելացնել 1 բաժակ եռացրած ջուր եւ 1 ժամ թողնել թրմվի, քամել: Խմել օրական 3 անգամ 50-ական միլիգրամ:
4. Վերցնել 1 մաս հազարատերեւուկ, 1 մաս կատվախոտ, 1 մաս արեւքուրիկ, խառնել իրար եւ 1 ճաշի գդալ խառնուրդի վրա ավելացնել 1 բաժակ սառը ջուր: 4 ժամ թողնել թրմվի, որից հետո 5 րոպե եռացնել: Եվս 2 ժամ թրմել ու քամել: Խմել օրական 3 անգամ, ամեն անգամ 1/3 բաժակ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
14.06.2017
