Կառավարության հունիսի 23-ի նիստի օրակարգում է ընդգրկված «Պետական եւ ծառայողական գաղտնիքի մասին» օրենքում փոփոխություններ կատարելու մասին որոշման նախագիծը: Այս փոփոխությամբ առաջարկվում է պետական եւ ծառայողական գաղտնիքի հետ առնչվող պետական պաշտոնյաններին հատկացվող որոշակի արտոնությունները վերացնել:
«Նախագծով առաջարկվում է ուժը կորցրած ճանաչել պետական և ծառայողական գաղտնիք կազմող տեղեկությունների օգտագործմամբ աշխատանքներ կատարող քաղաքացիների եւ այդպիսի գաղտնիքի պաշտպանության կառուցվածքային ստորաբաժանումների աշխատակիցների համար «Պետական եւ ծառայողական գաղտնիքի մասին» ՀՀ օրենքով սահմանված կարգով տրամադրվող արտոնությունների հետ կապված դրույթը»,-գրված է նախագծում:
Ներկայումս, ինչպես նշված է նախագծում, Հայաստանի օրենսդրությամբ սահմանված է, որ պետական եւ ծառայողական գաղտնիք կազմող տեղեկություններին առնչվելու համար պետական պաշտոն զբաղեցնող անձանց տրվում է հավելումներ, լրացուցիչ վարձատրություն:
Նախագծի հիմնավորման մեջ նաեւ գրված է. «Հանրապետական գործադիր մարմիններից ՀՀ ֆինանսների նախարարություն ներկայացված տեղեկատվության՝ պետական եւ ծառայողական գաղտնիք կազմող տեղեկությունների օգտագործման եւ պաշտպանության համար տրված հավելումների գումարը 2015 թվականին կազմել է 69.4 միլիոն դրամ, իսկ 2016 թվականի 1-ին կիսամյակում՝ 32 միլիոն դրամ: Ելնելով վերոգրյալից՝ օրենքի նախագծի ընդունումը, այլ հավասար պայմաններում կհանգեցնի ՀՀ պետական բյուջեի ծախսերի տնտեսման»:
Նելլի ԲԱԲԱՅԱՆ
