ԱԺ փոխխոսնակ Էդուարդ Շարմազանովն այսօր ԱԺ-ում հայտարարեց, որ խոսելու է հին հունական ոճով՝ հարց է տալու ու ինքն էլ պատասխանելու է իր հարցին. «Սեւանա լիճը ազգային հարստությո՞ւն է, թե՞ չէ, միանշանակ՝ այո, մենք պետք է հոգ տանե՞նք Սեւանի մասին, իհարկե՝ այո, մենք քայլեր ձեռնարկե՞լ ենք, թե՞ չենք ձեռնարկել: Այ այստեղ կարող ենք տարբեր կարծիքներ ունենալ»:
Հիշեցնենք, որ ԱԺ արտահերթ նիստում քննարկվում է Սեւանա լճից լրացուցիչ 100 մլն խմ ջրառ իրականացնելու նախագիծը:
Նա կոնկրետ փաստեր ներկայացրեց՝ «2007-ին Սեւանի մակարդակը եղել է 1898 մ, 24 սմ, 10 տարի անց՝ 2017-ին այն 1900 մ, 46 սմ է: Այսինքն, այն կարծիքները, թե իշխանությունը որեւէ քայլ չի ձեռնարկել, բավարար ուշադրություն չի դարձրել Սեւանի էկոհամակարգի խնդիրներին, իրականությանը չի համապատասխանում: Այնպես չի, որ այս 10 տարիների ընթացքում բան չենք արել: Մետր ու կեսից ավելի տարբերություն կա»:
Նախագիծը քննադատվում է, որովհետեւ լսումներ չեն իրականացրել: Ըստ ԱԺ փոխխոսնակի, իրատեսական չէ, որ լսումներ կազմակերպեին, նոր օրենքը բերեին: Որպես արդարացում, նա ասաց, որ 5-րդ գումարման ԱԺ-ն արդեն ավարտել էր իր աշխատանքները, ընդդիմությունը, իշխանությունը նախընտրական պայքարի մեջ էր, իսկ 6-րդ գումարման ԱԺ-ի իրավունքները նոր են մտնում ուժի մեջ, ֆիզիկապես հնարավորություն չկար, որ հանձնաժողովները մեծ քննարկում անեին:
Շարմազանովը հիշեցրեց, որ խոսքը 130 հազար գյուղացիների մասին է, որոնք առանց ջուր կմնան, եթե խորհրդարանը կողմ չքվեարկի. «Դուք պատկերացնո՞ւմ եք սա ինչ կատաստրոֆիկ իրավիճակի կհանգեցնի: Մենք պետք է պարզ ճակատով մտնենք, այդ գյուղացիներին ասենք, որ գիտեք ինչ կա, Սեւանի մակարդակը մի քանի սանտիմետր, որ ավել լիներ՝ մենք ձեզ ջուր չտվեցինք, որ վարկեր ավելի շատ ունենաք, ձեր երեխեքի ուսման վարձը չկարողանաք վճարել: Մենք 40 հազար հողը տալիս ենք չորանում ա՞, լուրջ կատաստրոֆա է: Չեմ կարծում, որ այս օրենքը վատի եւ վատթարագույնի միջեւ է, սա անհրաժեշտ ընտրություն է, Սեւանը մեր ազգային հարստությունն է, բայց նաեւ նրա համար է, որ մենք մի կողմից հոգ տանենք նրա համար, բայց եթե լինում է սակավաջրության տարի, կարողանանք օգտագործել Սեւանը՝ մեր քաղաքացիների կարիքները հոգալու համար»:
Հռիփսիմե ՋԵԲԵՋՅԱՆ
