Նիկոլ Փաշինյանին զարմացրել էր 2016-ի բյուջեի կատարման հաշվետվությունը, որը ներկայացրեց ԱԺ-ում ֆինանսների նախարար Վարդան Արամյանը:
Փաշինյանի խոսքերով՝ կառավարությունը վերլուծել է, թե ԵՄ-ում ինչ է կատարվում, ԵՏՄ անդամ պետություններում ինչ է կատարվում, բայց ապրիլյան պատերազմին որեւէ անդրադարձ չկա. «Մեր տնտեսական միջավայրի վրա պատերազմը ի՞նչ ազդեցություն է թողել: Մեր տնտեսությունը ինչքանո՞վ է պատրաստ իր վրա կրել պոտենցիալ եւ անխուսափելի պատերազմի բեռը: Պատերազմի ազդեցությունն ինչպիսի՞ն պետք է լինի տնտեսության վրա: Ասվում էր, որ ապրիլյան պատերազմից հետո հսկայական ծախսեր են արվել, բա ՀՆԱ-ի մեջ դա չի՞ երեւացել»:
Փաշինյանն ասաց, որ պատերազմի տարում ամենացածր պատմական դրամական փոխանցումներն են եղել. «Մենք, մեր պետականությունը սրանով արձանագրում է, որ պատերազմի տարում մենք ունենք վստահության լրջագույն ճգնաժամ՝ որպես պետություն»:
Արամյանը պատասխանեց. «Շատ դժվար է այդպիսի գնահատական կատարել»: Արամյանն ասաց, որ հակառակը, ապրիլյան պատերազմն էր հենց հիմնական խնդիրը, որ մենք ունեցանք 11 տոկոս, ոչ թե 15-20 տոկոս անկում: ՌԴ-ում փոխարժեքն է նաեւ նվազել, մեր հայրենակիցները այնտեղ եկամուտները գեներացնում են ռուսական ռուբլով, դժվար է ասել՝ իրականում ավելի շա՞տ են փոխանցել, թե՞ ավելի քիչ են փոխանցել:
Հռիփսիմե ՋԵԲԵՋՅԱՆ
