«Անգամ չեք իջել աղջկաս տեսնելու, ո՞վ է ձեզ հրամայել ստել». մահացած ծննդկանի հայրը՝ Անի Բաբելյանին (Տեսանյութ)

2015թ. մահացած ծննդկան Մերի Մարգարյանի գործով դատական նիստում այսօր հղիությունը վարած բժշկուհի, ամբաստանյալ Շուշանիկ Բախշյանից բացի, ցուցմունք տվեց նաեւ մյուս մեղադրյալը՝ «Շենգավիթ» ԲԿ հերթապահ բժիշկ, մանկաբարձ գինեկոլոգ Անի Բաբելյանը: Նա նշեց, որ զբաղված է եղել մեկ այլ հիվանդի նախավիրահատական շտապ պատրաստությամբ, երբ ԲԿ է դիմել Մերի Մարգարյանը:

«Այդ ժամանակ նա ասաց, որ գանգատ չունի, բայց 38 աստիճան ջերմություն ունի, այդ պատճառով իր բժշկուհին՝ Շուշանիկ Բախշյանն իրեն ասել է գնալ հիվանդանոց զննության: Ստուգեցինք, պտղի սրտի զարկերը նորմայի սահմաններում էին: Հետո բարձրացել եմ վիրահատարան եւ բուժանձնակազմին ասել, որ Մերիի ամբողջական հետազոտությունների տվյալները պատրաստ լինելուն պես բերեն ինձ՝ վիրահատարան»,-պատմեց Անի Բաբելյանը:

Նա ասաց, որ վիրահատության ընթացքում պարբերաբար հեռախոսով Մերիի հետազոտությունների արդյունքների մասին տեղեկացրել է Շուշանիկ Բախշյանին. «Ես ցուցում չեմ տվել հղիին տուն ուղարկելու, նման խոսակցություն լինել չի կարող, ընդամենը հետազոտության տվյալների մասին տեղյակ եմ պահել Շուշանիկ Բախշյանին: Վիրահատության ավարտից հետո տեղեկացա, որ Մերին հարազատների հետ հեռացել է»:

Ինչ վերաբերում է իրեն առաջադրված մեղադրանքին, Անի Բաբելյանն ասաց. «Ես որոշում չեմ կայացրել, չէի կարող վիրահատարանում գտնվելուց որոշում կայացնել՝ Մերիին հոսպիտալացնե՞լ, թե՞ ոչ: Ինձ համար շատ տարօրինակ է այդ մեղադրանքը»:

Անի Բաբելյանի ցուցմունքից պարզ դարձավ, որ «Շենգավիթ» ԲԿ-ում մեկ այլ հերթապահ բժիշկ է եղել, որը վիրահատություն չի ունեցել, սակայն նա հրաժարվեց պատասխանել, թե ինչու այդ բժիշկը չի զբաղվել Մերիի հետազոտությամբ:

Տուժողի իրավահաջորդ, Մերի Մարգարյանի հայրը՝ Վաղինակ Մարգարյանը պնդեց, որ Անի Բաբելյանը ստում է, որ նա չի իջել վիրահատարանից ու չի էլ տեսել Մերիին: «Աղջկաս խոսքերն եմ փոխանցում: Ասաց՝ «ոչ մեկն ինձ չի զննել, պապ ջան, ոչ մեկը չի իջել, քույրն ասում է, որ բժիշկը վիրահատարանում է»…Անի Բաբելյան, դուք այն անձը չեք, որ ստեք, ասեք՝ ո՞վ է ձեզ ստիպում ստել»: Անի Բաբելյանը նշեց, որ իրեն ոչ մեկը նման ցուցում չի տվել:

Ամբաստանյալի ինքնազգացողությունը վատացավ, նա լաց եղավ: Հաջորդ նիստը նշանակվեց հուլիսի 25-ին, ժամը 10:30-ին:

Մանրամասն՝ տեսանյութում:

Լուիզա ՍՈՒՔԻԱՍՅԱՆ