Բաքվի ծանր հանցագործությունների դատարանում շարունակվում է ռուս բլոգեր Ալեքսանդր Լապշինի գործով դատավարությունը, գրում է ԱՊԱ-ն:
Այսօր տեղի ունեցած հերթական դատական նիստի ընթացքում հանդես է եկել Լապշինի փաստաբան Էդուարդ Չերնինը՝ խնդրելով արդարացնել իր պաշտպանյալին, քանի որ նրա դեմ առաջ քաշած մեղադրանքներն անհիմն են:
«Փորձագետի կարծիքը հիմնված չէ հուսալի ապացույցների վրա, քանի որ Լապշինն իր հոդվածներում կոչ չի արել խախտել Ադրբեջանի տարածքային ամբողջականությունը»,- ասել է փաստաբանը:
Այնուհետև խոսքի իրավունք է տրվել Լապշինին: Վերջինս չի ընդունել իր դեմ առաջ քաշված մեղադրանքները : «Ադրբեջանցիների առաջ իմ մեղքը միայն բարոյական հարթությունում է, և ոչ մի դեպքում՝ իրավական: Ես հասկանում եմ՝ ինչքան կարևոր է Ղարաբաղն Ադրբեջանի համար: Ոչ մի պարագայում ես հանցավոր կապի մեջ չեմ եղել Հայաստանի իշխանությունների հետ»,- ասել է բլոգերը:
ԱՊԱ-ի հաղորդմամբ, իր խոսքում Լապշինը նաև հույս է հայտնել, որ Ղարաբաղյան հարցը կլուծվի հօգուտ Ադրբեջանի տարածքային ամբողջականության: «Ես ափսոսում եմ արածիս համար, ափսոսում եմ, որ մեկնելով Ղարաբաղ՝ տառապանքներ եմ բերել օկուպացիայի զրկանքները կրող նրա բնակիչներին: Ես գաղափար չունեի օկուպացիայի մասին: Այստեղ լինելով՝ ես իմ նկատմամբ միայն լավ վերաբերմունք եմ տեսել»,- ասել է նա:
Դատավարությունը կշարունակվի վաղը, որի ընթացքում կհնչի դատավճիռը:
Պատրաստեց՝ Վիկտորյա ԱՆԴՐԵԱՍՅԱՆԸ
