«Այժմ մեր ունեցած հակակարկտային կայանքներն այն պաշտպանող միջոցը չեն, որը հնարավորություն կտան ամբողջովին զերծ մնալ տեղացած կարկուտների պատճառած վնասներից»,- այսօր տեղի ունեցած մամուլի ասուլիսում ասաց Արցախի Հանրապետության գյուղատնտեսության նախարար Արամ Մխոյանը՝ հավելելով, որ կառավարությունը նախատեսել է աջակցություն տրամադրել կարկտահարված ցանքատարածություններ ունեցող հողօգտագործողներին:
«Այս տարի ունեցանք ընդհանուր 5-6 հազար հեկտար կարկտահարված ցանքատարածքներ, որոնց մի մասը 50 %-ից ավել էր վնասվել: Մարտունու շրջանի Սոս և Մաճկալաշեն համայնքների տուժողներին մի քանի օրվա ընթացքում կազմակերպվել էր աջակցություն՝ յուրաքանչյուր շնչին տրամադրելով հավի ճտեր և կեր՝ պարզապես մեղմելու կրած վնասը: Բացի այդ բոլոր հացահատիկային մշակաբույսերի մասով տուժած հողօգտագործողներին անհատույց տրամադրելու ենք բարձրակարգ սերմացուներ, որպեսզի նրանք հնարավորություն ունենան հաջորդ տարի պատրաստվել ցանքին: Այս ամենից բացի՝ կարկտահարությունից տուժած բոլորը հողօգտագործողները ազատվել են հարկերից, ինչպես նաև ժամանակավորապես սառեցվելու են նրանց ունեցած վարկերն ու, փոխառությունները, մինչև հնարավորություն կունենան մարելու»,- նշում է նախարարը և ավելացնում, որ կարկտահարության հետևանքով բանջարեղենի մշակմամբ զբաղվող տուժած հողօգտագործողները կստանան աջակցություն՝ 1 հա-ի հաշվով 200 հազար դրամ:
Դավիթ ԱԲԱՂՅԱՆ
