Մամուլում ադրբեջանական մանկական կերերի ներկրման հետ կապված բավականին մեծ աղմուկ էր բարձրացել: Մասնավորապես, խոսքը Nutrilon ապրանքանիշի՝ մինչեւ 6 ամսական երեխաների համար նախատեսված կաթի փոշու մասին է: Այն Հայաստան ներկրում է «ՍԼԱՎ ԳՐՈՒՊ» ընկերությունը, որը պատկանում է ԱԺ պատգամավոր, գործարար Արկադի Համբարձումյանին: Վերջինս լրագրողների հետ զրույցում հերքել էր, որ մանկական կերը ադրբեջանական ծագման է:
ԱԺ-ում լրագրողների հետ զրույցում ՊԵԿ նախագահ Վարդան Հարությունյանն ադրբեջանական կաթի փոշու հետ կապված կարծես «բոչկա գլորեց» դեպի ՍԱՊԾ-ն՝ ասելով, որ հարցերն ուղղենք իրենց:
Aravotа.am-ը ՍԱՊԾ սննդամթերքի անվտանգության եւ որակի հսկողության տեսչության պետ Վահե Դանիելյանին հարցրեց՝ ի վերջո ադրբեջանական մանկական կերերն ինչպե՞ս էին ներկրվել: Նա պատասխանեց. «Ադրբեջանական կաթի փոշի մանկական կեր գոյություն չունի»: Հարցին՝ բա ինչի՞ց այդ աղմուկը բարձրացավ, լուսանկարներ հրապարակվեցին՝ նա պատասխանեց. «Խնդիրը լրագրողների սխալ մեկնաբանություններն էին: Եթե եվրոպական մի ընկերություն արտադրում է արտադրանք եւ 5 լեզվով մակնշում է իրականացնում, որովհետեւ 5 տարբեր երկրներից ունի պատվեր, ինքը այդ նույն տարան վաճառում է 5 տարբեր երկրների, պատվիրատուներից մեկը հանդիսանում է Հայաստանը, մեկը՝ Ադրբեջանը, եւ նա երկու լեզվով էլ մակնշում է այդ արտադրանքի վրա, արդյո՞ք դա դառնում է, թե ծագումը ադրբեջանական է: Միայն մակնշման խնդիր է: Ընդամենը այնտեղ ֆեյսբուքի լինք է դրած՝ ադրբեջանական մայրիկների ինչ-որ ակումբ, որը այդ ընկերության հետ կապված է: Դա ադրբեջանական ծագման չէ, կան բոլոր փաստաթղթերը: Նույն հաջողությամբ, եթե Հայաստանից պատվեր լինի ՌԴ գնացող, կամ ՌԴ-ից Հայաստան եկող պատվերներ լինեն, ադրբեջանական շուկայում տեսնեն, որ այնտեղ հայերեն մակնշում կա, ասեն՝ սա հայկական արտադրանք է»:
Հռիփսիմե ՋԵԲԵՋՅԱՆ
