2016թ. ԱՄՆ-ում «Գինեսի» գրքի քառակի ռեկորդակիր Դավիթ Ֆահրադյանը հերթական՝ հինգերորդ ռեկորդն է սահմանել՝ մարմնամարզական պտտաձողի վրա կատարելով 92 անընդմեջ պտույտ՝ ձեռքերի հակառակ բռնվածքով: Այսօր «Պոստ սկրիպտում» մամուլի ակումբում լրագրողների հետ հանդիպմանը Դավիթ Ֆահրադյանը տեղեկացրեց, որ ռեկորդի սերտիֆիկատն օրերս են ստացել: « Ռեկորդի հայտն ընդունվեց, իսկ ամիսներ անց՝ օնլայն սերտիֆիկատը հասավ մեզ, հիմա էլ հենց սերտիֆիկատն ենք ստացել: Նման ռեկորդ ոչ մի մարմնամարզիկի կողմից չի եղել, մարզվել եմ մոտ երեք տարի: Սա 5-րդ ռեկորդն է. մարմնամարզության մեջ եզակի է, երբ մարմնամարզիկը 5 սերտիֆիկատ ունի»,-նկատեց Դավիթը:
Նա նշեց, որ պտտաձողը սպորտային մարմնամարզության ձեւերից է. «Պտույտներն արտասովոր են, գրեթե երկու մատով եմ բռնվում պտտաձողից՝ թեւերը հակառակ վիճակում: Ռեկորդին նախապատրաստվելը երկար է տեւել: 94 պտույտ եղավ, հայտը տրված էր 51 պտույտ, բայց գերազանցեցի՝ 2 րոպե եւ 18 վայրկյանում»:
Դավիթ Ֆահրադյանը 7 տարեկանից զբաղվել է սպորտային մարմնամարզությամբ, հիմնել է մարմնամարզության դպրոց, դասավանդում է ԵՊՀ սպորտի ամբիոնում:
Լուիզա ՍՈՒՔԻԱՍՅԱՆ
