Որ մանկապարտեզ հաճախող երեխան հնարավորինս զերծ մնա վիրուսներից ու վարակներից, մանկաբույժ Մարի Դարակչյանը ծնողներին խորհուրդ է տալիս երեխային սովորեցնել անձնական հիգիենայի պահպանում` ձեռքերի հաճախակի լվացում, հեռու մնալ հիվանդ երեխաներից, չկիսել նրանց հետ ընդհանուր բաժակ, ափսե եւ այլն:
Մանկաբույժի խոսքով, սովորաբար մինչեւ մանկապարտեզ գնալը, երեխան տարեկան հիվանդանում է 3-4 անգամ: «Եթե տարեկան 3-4 անգամ մինչեւ մանկապարտեզ հաճախելը երեխան հիվանդանում է, ապա առաջին տարում պարտադիր նույնիսկ մինչեւ 11 անգամ կարող է հիվանդանալ, իսկ դա համարվում է հիվանդությունների քանակի նորմալ միջակայք, քանի որ երեխան հանդիպում է նոր վիրուսների ու հարուցիչների… Այդ քանակի հիվանդանալը վախենալու չէ, եթե երեխան առողջ է»,- այսօր «Զարկերակ» ակումբում ասաց մասնագետը:
Նա նաեւ խորհուրդ է տալիս ծնողներին չհրաժարվել մանկապարտեզներից միայն հիվանդություններից վախենալու պատճառով, որովհետեւ սովորաբար առաջին տարվանից հետո երեխայի հիվանդանալու հաճախակիությունը նվազում է` տարեկան 3-5 անգամ։
Մանկաբույժի խոսքով, եթե երեխան մանկապարտեզ չհաճախի, հիվանդանալու հավանականությունը չի բացառվում դպրոցում` տարրական դասարաններում, եւ երեխայի օրգանիզմը նոր-նոր սկսում է սովորել նոր հարուցիչներին, այնինչ մյուս երեխաների մոտ դա արդեն մանկապարտեզում է եղել։
Արփինե ՍԻՄՈՆՅԱՆ
