Լիլիթ Խաչատրյանը դպրոցահասակ երեխաների ծնողներին խորհուրդ է տալիս ամառային արձակուրդներից հետո երեխային նախապատրաստել դպրոցին:
«Ամռանը, երբ երեխան շատ ազատ ժամանակ է ունենում, միայն տրվում է առօրյա հաճույքներին, անում այն, ինչ ուզում է, միանգամից անցում կատարելը դպրոցական կյանքին, շատ բարդ է, ու երեխաների համար այդ կտրուկ անցումից կարող են բարդություններ առաջանալ, հատկապես այն դեպքում, երբ ծնողներն այդքան էլ չեն կարողանում օգնել իրենց երեխաներին ու համապատասխան փուլերն ապահովեն»,- այսօր «Զարկերակ» ակումբում ասաց հոգեբանը:
Ըստ նրա` դպրոց գնալու նախապատրաստական աշխատանքների մեջ է մտնում օրինակ երեխաների հետ դպրոցական պարագաների գնումները: Հոգեբանի խոսքով, դա երեխային կօգնի ավելի արագ գիտակցել, որ շուտով դպրոց է գնալու: Նա նաեւ ասաց, որ ոչ մի դեպքում չի կարելի դպրոցից տուն եկող երեխային միանգամից նստեցնել դաս սովորելու կամ նրան հարցախեղդ անել` ինչ եղավ դպրոցում, կամ էլ միանգամից տանել լրացուցիչ պարապմունքի. «Սա բարդացնում է երեխայի հարմարմանը դպրոցին: Պետք հասկանալ, որ երեխան նոր է գնում դպրոց ու գոնե առաջին ամիսը նրան հանգիստ թողնել»:
Արփինե ՍԻՄՈՆՅԱՆ
