«Ժիրայր Սեֆիլյանի եւ մուսների գործով» դատական նիստում այսօր նախագահող դատավոր Տաթեւիկ Գրիգորյանը քննության առավ ամբաստանյալ Ժիրայր Սեֆիլյանի հանդեպ տեսակցությունների արգելքը վերացնելու հարցը եւ որոշեց այն բավարարել:
Դատավորը հայտնեց, որ Սեֆիլյանի հարազատները, մասնավորապես՝ կինը եւ երկու զավակները, այսուհետեւ կարող են տեսակցել նրան:
Դատարանի համապատասխան գրությունը կուղարկվի «Արմավիր» ՔԿՀ պետին: Հիշեցնենք, որ «Հիմնադիր խորհրդարան»-ի առաջնորդ, Շուշիի առանձնակի գումարտակի հրամանատար, ազատամարտիկ Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ զավթելու փորձի մեջ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Լուիզա ՍՈՒՔԻԱՍՅԱՆ
