Հոգեբան Սամվել Խուդոյանը ուսումնական տարեսկզբին ընդառաջ խորհուրդ է տալիս առաջին դասարանի երեխաների նկատմամբ ուշադիր լինել:
Ըստ նրա՝ ծնողները պետք է խրախուսեն, իսկ ուսուցիչներն օգնեն առաջին դասարանցիներին, քանի որ, ըստ հոգեբանի, շատ կարևոր է, որ երեխան հոգեպես պատրաստ լինի դպրոց գնալուն:
«Դժվար է լինում այն երեխաների համար, որոնք հոգեպես պատրաստ չեն դպրոց գնալ: Իսկ այն երեխաները, որոնք պատրաստ են դպրոցի, նրանց մոտ էլ հակառակն է, նրանց հաճախ կարելի է տեսնել «դպրոց-դպրոց» խաղալիս»,-այսօր «Հենարան» ակումբում ասաց հոգեբանը:
Սամվել Խուդոյանի խոսքով, որ առաջին անգամ դպրոց գնացող երեխայի համար մանկապարտեզից դպրոց անցումը լինի հարթ, շատ կարևոր է ուսուցիչների դերը. «Ուսուցիչները պետք է երեխաներին ճիշտ վերաբերվեն, որովհետև դա երեխայի համար զգայական շրջան է, երեխան առաջին անգամ սիստեմատիկ սկսում է սովորել, առաջին տպավորությունն էլ շատ կարևոր է»:
Հոգեբանը հորդորում է ծնողներին խուսափել ծեծով դաս սովորեցնելու պրակտիկայից, եթե նույնիսկ 10 անգամից 1 անգամ է ճիշտ գրել, պետք է խրախուսել ու գովել այդ մեկ անգամի համար. «Քանի որ երեխան փոխում է իր միջավայրը, մանկապարտեզում նա հարմարվել էր, իր ստատուսն ուներ այդ միջավայրում, այստեղ պիտի պայքարի իր ստատուսի համար: Իսկ ուսուցիչները պետք է օգնեն, որ երեխան նորմալ կարգավիճակ ձեռք բերի, հարմարվի»:
Արփինե ՍԻՄՈՆՅԱՆ
