Ամուլսարի գործով դատարանը որոշեց՝ հ/կ-ները պատշաճ սուբյեկտ չեն, իրավունք չունեն դատարան դիմել

Վայոց ձորի մարզի Գնդեվազ համայնքի քաղաքացիները և «Էկոլոգիական իրավունք», «Էկոդար» հ/կ-ներն ընդդեմ պետական մի քանի գերատեսչությունների գործով դատական նիստին այսօր դատարանը որոշեց, որ հ/կ-ները պատշաճ սուբյեկտ չեն ու իրավունք չունեն դատարան դիմել, որովհետեւ չեն ապահովում օրենքի դրույթները:

Նախագահող դատավորն իր այս որոշումը հիմնավորեց այս տարվա ամռանը ուժի մեջ մտած հ/կ-ների մասին նոր օրենքով:

Հ/կ-ների ներկայացուցիչները սպասում են դատարանի որոշման գրավոր հիմնավորմանը՝ հասկանան՝ օրենքի որ կետով չեն ապահովում օրենքի դրույթները:

Բնապահպան Արթուր Գրիգորյանը պնդում է՝ դատարանի որոշումը հակասում է Օրհուսի կոնվենցիայի համապատասխանության կոմիտեի եւ ՀՀ կառավարության դիրքորոշմանը, որը բազմիցս կոմիտեին ներկայացրել է հիմնավորումներ, թե տեսեք՝ ապահովում ենք հ/կ-ների՝ դատարան դիմելու իրավունքը, այս էլ օրենքը, որը ընդունել ենք, որ ամրապնդի այդ իրավունքը:

Բնապահպանները դատարանի որոշումը համարում են քաղաքական որոշում, իրավական գործընթացի հետ կապ չունեցող: Նրանց կարծիքով, հ/կ-ներին դատարան դիմելու իրավունքից զրկելու նպատակը մեկն է՝ փակել բոլոր դռները բնապահպանների առջեւ: Դատական հաջորդ նիստը նշանակվեց սեպտեմբերի քսանութին:

Նշենք, որ հայցվորները վիճարկում են Ամուլսարի շահագործման վերաբերյալ Էներգետիկայի և բնական պաշարների, Բնապահպանության նախարարությունների կողմից դրական եզրակացությամբ տրված փորձաքննությունները, ինչպես նաև առանձին հայցով՝ Գիտությունների ազգային ակադեմիայի Սևանա լճի պահպանության փորձագիտական հանձնաժողովի կողմից տրված դրական եզրակացության իրավաչափությունն ու հանքի շահագործման համար հիմք ծառայող այլ թույլտվություններ:

Արփինե ՍԻՄՈՆՅԱՆ