Արցախն այժմ անկախ պետություն է, բայց անկախության հռչակումը միջոց էր, քանի որ մեր նպատակը մայր Հայաստանի հետ միացյալ հայրենիք լինելն է: Այս մասին Aravot. am-ի հետ զրույցում ասաց Արցախի թեմի առաջնորդ, Արցախի հերոս Պարգև արքեպիսկոպոս Մարտիրոսյանը:
«Ադրբեջանը ուզում է պատերազմ: Դա է ցույց տալիս նրա պարբերաբար զինվելը: Սակայն նրանց բանակը չունի այն ոգին, որն ունեն մեր 18 -20 տարեկան տղաները. դա ցույց տվեց 2016 թվականի ապրիլը, երբ նրանցից ոչ ոք չլքեց իր խրամատը»,- շեշտում է Արցախի թեմի առաջնորդը:
Նրա խոսքով Ադրբեջանը չի ցանկանում բանակցությունների սեղանի շուրջ նստել: Փորձում է ուժի միջոցով հարցի լուծում տալ, քշել արցախահայերին պատմական հողերից. նրանց համար սա հողի կռիվ է:
«Մեզ համար սա հասկանալի է, դա հստակ է նաև ամբողջ աշխարհի համար: Բայց մենք պետք է փորձենք որքան հնարավոր է լուծումը գտնել բանակցությունների միջոցով»,- նշում է Պարգև արքեպիսկոպոս Մարտիրոսյանը:
Դավիթ ԱԲԱՂՅԱՆ
