Վարչապետ Կարեն Կարապետյանն այսօր նախքան կառավարության նիստի օրակարգին անցնելը ՊԵԿ-ի ղեկավարին ու գյուղնախարարին հանձնարարեց քննարկել եւ երկօրյա ժամկետում կառավարության աշխատակազմին ներկայացնել 90 օրից էլ շուտ ժամկետում ավելացված արժեքի հարկը գինու եւ կոնյակի արտահանմամբ զբաղվող ընկերություններին վերադարձնելու հարցը:
Վարչապետն ասաց, որ կառավարությունում հանդիպում է եղել գինեգործությամբ ու կոնյակագործությամբ զբաղվող ընկերությունների ներկայացուցիչների հետ, որոնք էլ բարձրացրել են ԱԱՀ-ի՝ նախատեսված ժամկետից շուտ վերադարձման հարցը: Վարչապետի համոզմամբ էլ 90 օրում այն վերադարձնելը կարող է որոշ դեպքերում ֆինանսական դժվարություններ ստեղծել արտահանողների համար:
Վարչապետը նաեւ ասաց, որ մթերման ժամանակահատվածում կառավարությունը գինու եւ կոնյակի արտահանողների համար ստեղծել է դրամային վարկային ռեսուրս, որպեսզի մթերումն անցկացվի «մաքսիմալ արագ եւ արդյունավետ»:
Լուսինե ԲՈՒԴԱՂՅԱՆ
