Վարչապետ Կարեն Կարապետյանը գյուղատնտեսական ոլորտի վերաբերյալ կառավարության այսօրվա նիստում որոշ հանձնարարականներ տվեց:
Կարեն Կարապետյանը կառավարության անդամներին հիշեցրեց, որ գյուղատնտեսությունը ճանաչվել է որպես գերակա ճյուղ:
Նրա խոսքերով. «Կառավարությունը շեշտը դնում է գյուղական համայնքների տնտեսական մեծ ներուժը բացահայտելու, անհրաժեշտ պայմաններ ապահովելու և այն արդյունավետ ձևով իրագործելու վրա: Վերջին ամիսներին գյուղատնտեսության ոլորտին վերաբերող վիճակագրական արդյունքները մեզ համար մտահոգության տեղիք են տալիս, և, հետևաբար, առկա է այդ ոլորտում ձևավորվող համախառն արդյունքների հաշվառման վերլուծության անհրաժեշտություն»:
Վարչապետն ասաց, որ սա առավել կարևոր է համայնքային զարգացման համար, որպեսզի համախառն արդյունքի գնահատումը կառավարության համար դառնա կանխատեսելի ու հաշվառելի:
Այս ամենից ելնելով՝ վարչապետը Գյուղատնտեսության, Տարածքային կառավարման և զարգացման նախարարներին, մարզպետներին ու Ազգային վիճակագրական ծառայությանը հանձնարարականներ տվեց, որ երկու շաբաթվա ընթացքում վերլուծեն գյուղոլորտում արձանագրած ցուցանիշներն ու անկման պատճառները, ապա ներկայացնել կառավարությանը:
Կարեն Կարապետյանը անդրադարձավ պաշտոնական ցուցանիշներին: Նրա խոսքերով՝ այս տարվա հունվար-օգոստոսը նախորդ տարվա հունվար-օգոստոսի համեմատ բոլոր ոլորտներում արձանագրվել է աճ, բացի գյուղատնտեսությունից և շինարարությունից. «Ընդ որում, շինարարության թվերի դինամիկան մեզ ցույց է տալիս, որ մենք կոմպենսացնում ենք այն հետ ընկնելը: Դրան գումարած այն հանձնարարությունները, որոնք մենք տվել ենք շինարարության ոլորտին, դրան գումարած քաղաքաշինական կոմիտեի նախագահի կանխատեսումները, մենք այդտեղ մեծ պրոբլեմներ չենք տեսնում: Գյուղատնտեսության մասով մեզ պետք է ռեալ թվերը հասկանանք: Շատ ուշադիր անդրադառնում ենք դրան»:
Նելլի ԲԱԲԱՅԱՆ
