ՀՅԴ խմբակցության ղեկավար Արմեն Ռուստամյանը պնդում է, որ կոալիցիոն ՀՀԿ-ի եւ ՀՅԴ-ի հարաբերությունները չեն վատացել Ընտրական օրենսգրքում ՀՅԴ-ի կողմից առաջարկվող փոփոխությունների ֆոնին: Այս մասին խորհրդարանում լրագրողների հետ զրույցում ասաց պատգամավորը:
Հիշեցնենք, ՀՅԴ-ն պատրաստվում է փաթեթ ներկայացնել, հիմնական վիճելի հարցը վարկանիշային ընտրակարգի վերանայումն է: ՀՀԿ-ում կտրուկ դեմ են այդ համակարգի վերանայմանը: Սակայն Արմեն Ռուստամյանը պնդում է, որ այս սկզբունքային հակասությունը չի կարող դառնալ կոալիցիայի տրոհման պատճառ:
Երեկ «Ծառուկյան» խմբակցության պատգամավոր Նաիրա Զոհրաբյանն ասել էր, որ վարկանիշային համակարգի փոփոխության հարցով ինքը զրուցել է Արմեն Ռուստամյանի հետ եւ հույս ունեն, որ այս հարցում քաղաքական կոնսենսուսի կհանգեն: Արմեն Ռուստամյանը հայտարարեց, որ «Ծառուկյան» դաշինքի մոտեցումն իրենց համար անընդունելի է: «Իրենք ասում են`նախագիծը տանենք, հանձնաժողովը մերժի»,- ասաց Արմեն Ռուստամյանը`հավելելով, որ ՀՅԴ-ն կողմ է դանդաղ առաջ գնալուն, բայց դրական արդյունքի հասնելուն:
Արմեն Ռուստամյանը մի քանի անգամ անտեսեց Aravot.am-ի հարցը`«Ծառուկյան» դաշինքը դեմագոգիայո՞վ է զբաղված: Ապա ասաց. «Չէ: Ես նման բա՞ն եմ ասել: Ես որեւէ մեկին դեմագոգ չեն անվանում, առավել եւս՝ մեր գործընկերներին: Նրանք բոլորը պարկեշտ մարդիկ են եւ նվիրված իրենց երկրին»:
Մանրամասները`տեսանյութում
Նելլի ԳՐԻԳՈՐՅԱՆ
