«Մենք ճիշտ ու հնարավոր չենք համարում համագործակցությունը նոր իշխանության հետ, նոր կառավարությունում աշխատելը՝ անկախ նրանից, թե ինչ կառավարություն այն կկոչվի՝ անցումայի՞ն, ազգային համաձայնությա՞ն թե՞ այլ»,- այսօր արտասահմանցի լրագրողների հետ հանդիպմանը հայտարարեց Հանրապետական կուսակցության փոխնախագահ, ԱԺ պատգամավոր Արմեն Աշոտյանը:
Ըստ նրա՝ «Քաղաքական երեսպաշտություն կհամարվեր որևէ պաշտոն զբաղեցնելը նոր կառավարությունում», – հավելեց քաղաքական գործիչը:
Արմեն Աշոտյանը վստահեցրեց, որ իրականությանը չեն համապատասխանում որոշ հայտարարություններ, թե ՀՀԿ-ն լքում է քաղաքական դաշտը, ըստ նրա՝ այդ հայտարարությունները վաղաժամ են և չեն բխում ներկայիս քաղաքական իրավիճակից:
«Մեր ընդդիմախոսներն իրենք են պնդում, որ մեր շարքերում կան անձինք, ովքեր կարող են օգտակար լինել Հայաստանի տնտեսական, քաղաքական, սոցիալական ոլորտներում: Հանրապետական կուսակցությունը առաջին հերթին ցույց տվեց իր կոնսոլիդացված դերը որպես ընդդիմություն, երկրորդ հերթին մեզ հաջողվեց պահպանել կուսակցական միատարր կառուցվածքը և երրորդ հերթին մենք կգտնենք մեր տեղը Հայաստանում ստեղծված նոր քաղաքական իրավիճակում: Այդ տեղը, եթե իշխանության մեջ չէ, ապա ընդդիմության մեջ է… յուրաքանչյուր իշխանություն, որը վայելում է հանրության աջակցությունը, միևնույնն է ընդդիմության կարիքն ունենալու է», – հավելեց Արմեն Աշոտյանը:
ՀՀԿ-ն, ըստ Աշոտյանի, լինելու է կառուցողական ընդդիմություն:
Արփինե ՍԻՄՈՆՅԱՆ
