ՀՀ քննչական կոմիտեի Տավուշի մարզային քննչական վարչությունում Բերդի տարածաշրջանի սահմանամերձ Այգեձոր համայնքի նախկին ղեկավար Սասուն Սաֆարյանի նկատմամբ ՀՀ քրեական օրենսգրքի 258 հոդվածի 1–ին մասով («Խուլիգանությունը») քրեական գործ է քննվում:
1968թ. ծնված, անկուսակցական Ս. Սաֆարյանը 2017թ. նոյեմբերի 5-ին կայացած ընտրություններում խոշորացված Բերդ համայնքի ղեկավարի թեկնածու էր, ստացած ձայների քանակով նա 4 թեկնածուների մեջ 3-րդն էր:
Իրավապահներից ստացված տեղեկություններով՝ Ս. Սաֆարյանը ժողովրդական շարժման ընթացքում մտել է Այգեձորի միջնակարգ դպրոցի շենք, տնօրենին եւ ուսուցիչներին հայհոյելով հանդիմանել, թե նրանք ինչո՞ւ չեն միանում ժողովրդական շարժմանը: Փորձեցինք պարզաբանումներ ստանալ Ս. Սաֆարյանից, սակայն նրա բջջային հեռախոսահամարին մեր զանգերն անպատասխան մնացին:
1999 թվականից Այգեձորի դպրոցը ղեկավարող Էլմիրա Եղիազարյանն ասաց, որ արդեն հաշտվել են Ս. Սաֆարյանի հետ, բողոք չունեն, հիմա հանդուրժողականության մթնոլորտ է, մի քանի անգամ կրկնելով՝ ոչինչ չկա:
Ոսկան ՍԱՐԳՍՅԱՆ
