«Նիկոլ Փաշինյանը պարտություն է կրել ԵՄ ճակատում: Նրա Բրյուսելյան այցը պարտություն էր: Գնալ այնտեղ եւ ասել՝ «ես ՌԴ-ի դաշնակիցն եմ», ճիշտ չէ: Դա ասվեց այն դեպքում, երբ ԵՄ որոշ ղեկավարներ Պուտինի անձնական թշնամիներն են»,-«Հենարան» մամուլի ակումբում այսօր լրագրողների հետ հանդիպմանն անդրադառնալով ՀՀ վարչապետ Նիկոլ Փաշինյանի վերջերս Բրյուսել այցին, ասաց քաղտեխնոլոգ Արմեն Բադալյանը: «Այդքանը հերիք չէ, մի բան էլ վարչապետն ասում է ԵՄ-ին՝ «փող տվեք»: Չի ստացվելու այդպես: Ո՞րն է ՀՀ-ԵՄ քաղաքական օրակարգը՝ փող տուր, որովհետեւ հեղափոխություն է եղե՞լ»…այդ մեթոդը տարիներ շարունակ օգտագործել է Ուկրաինայի նախագահ Պորոշենկոն»,-նշեց Արմեն Բադալյանը:
Նրա գնահատմամբ՝ նոր կառավարությունը չի հստակեցրել նաեւ ԱՄՆ-ի հետ հարաբերությունների օրակարգը. «Այս պահի դրությամբ միայն PR եմ տեսնում: Ամեն ինչ անում են, որ սեպտեմբերին Փաշինյանը հինգ րոպե ոտքի վրա հանդիպի Թրամփի հետ: Դա ՀՀ-ԱՄՆ հարաբերություն չէ, դա PR ակցիա է: Անգամ եթե այդ հանդիպումը կայանա, դա չի կարելի համարել քաղաքական օրակարգ»:
Ըստ քաղտեխնոլոգի՝ ԱՄՆ-ն ՀՀ-ին փող չի տալու, որովհետեւ չգիտի, թե ՀՀ-ն ինչ է ուզում:
Փորձագետի գնահատմամբ՝ նոր կառավարության արտաքին քաղաքականությունը, մեղմ ասած, անհաջող է. «Ինչ իշխանության գլուխ եկավ Նիկոլ Փաշինյանը, կրկնում է, որ չենք փոխում մեր արտաքին քաղաքականության վեկտորը: Մի անգամ ասեց՝ հասկացանք, բայց ի՞նչ կարիք կա ամեն լրատվամիջոցի հետ հարցազրույցում նույնը կրկնել»:
Լուիզա ՍՈՒՔԻԱՍՅԱՆ
