Այսօր ԵՊԼՀ նախկին ուսանողական խորհրդի չհրկիզվող պահարանում հայտնաբերվել են 56 ՀՀԿ կուսակցական տոմսեր։
Այս մասին իր ֆեյսբուքյան էջում գրել է Երևանի Վալերի Բրյուսովի անվան պետական լեզվահասարակագիտական համալսարանի ուսանող, «ԵՊԼՀ Ռեստարտ» ուսանողական-քաղաքացիական նախաձեռնության անդամ Միքայել Նազարյանը։
Չհրկիզվող պահարանը բացվել է էլեկտրական կտրիչով, քանի որ ուսանողական խորհրդի նախկին անդամները հրաժարվել են բանալի տրամադրել։
Այս թեմայի շուրջ Aravot.am-ը զրուցեց ՈՒԽ նախկին նախագահ Ռոզա Հակոբյանի հետ։
Հակոբյանը նշեց, որ իր նախագահության շրջանում ուսանողական խորհուրդը զբաղվել է միայն ուսանողական խնդիրներով, իսկ մինչ իր նախագահությունը տեղի ունեցածի համար ինքը պատասխանատվություն չի կրում։
Նրա խոսքով ՈւԽ գույքը ապօրինի կերպով հանել են սենյակից՝ առանց ընդունում հանձնում անելու, և հայտնի չէ՝ տեղափոխումից հետո ինչեր են ավելացել կամ պակասել։
Մեր այն հարցին, թե իր նախագահության շրջանում երբևէ չի՞ բացել չհրկիզվող պահարանը և չի՞ տեսել կուսակցական տոմսերը, Հակոբյանը պատասխանեց․
«Այդ պահարանում տարբեր իրեր են եղել, վերջիվերջո, դա ուսանողական խորհրդի սենյակն է և տարբեր ուսանողներ իրենց անձնական իրերն են թողնում այնտեղ։ Ես չեմ նկատել էդպիսի բան, ճիշտն ասած, չգիտեմ»։
Aravot.am-ը զրուցեց նաև «ԵՊԼՀ Ռեստարտ» նախաձեռնության անդամ Միքայել Նազարյանի հետ։
Նազարյանը վստահեցրեց, որ պահարանը տեղափոխվելուց առաջ կնիքվել է, և կնիքը առկա է եղել այն բացելիս։
Նրա խոսքով չհրկիզվող պահարանը բացելիս՝ իրենց նախաձեռնության անդամներից որևէ մեկը ներկա չի եղել։
«Այն բացվել է հանձնաժողովի կողմից, որի անդամները ամբիոնի վարիչներն ու դասախոսներն են, ուսանողությունը ոչ մի կերպ ներգրաված չի եղել այդ պրոցեսում»,-ասաց Նազարյանը։
Նա նաև նշեց, որ ընդունման- հանձնման ժամանակ հայտնաբերվել են պակասորդներ, մասնավորապես չկան երկու համակարգիչներ և մեկ ֆոտոխցիկ։
Հավելենք, որ 56 անդամատոմսերից 51-ը ԵՊԼՀ ուսանողների անունով են, իսկ մյուս չորսը՝ անհայտ։
Լուսանկարը` Միքայել Նազարյանի ֆեյսբուքյան էջից:
Սոնա Գևորգյան
