Զարմանալի է, որ Ադրբեջանի արտգործնախարարը փորձում է լավատեսության մասին խոսել սպասվող բանակցությունների վերաբերյալ: Կարծում եմ, որ Ադրբեջանի լավատեսական հիմքերը պարզապես տպավորություն թողնելու նպատակ են հետապնդում: Այս մասին այսօր տեղի ունեցած մամուլի ասուլիսի ընթացքում ասաց Արցախի ԱԺ նախագահ Աշոտ Ղուլյանը:
Նա նշեց, որ հակառակ պարագայում Ադրբեջանի քաղաքական պատասխանատուների հայտարարությունների մեջ որևէ նորություն կլիներ` հակամարտության կարգավորման հայեցակարգի վերաբերյալ:
«Բանակցային գործընթացի որոշակի ակտիվության համատեքստում ինձ թվում էր, թե Ադրբեջանը պետք է հրաժարվի տարիներ շարունակ ունեցած իր կարծրատիպերից: Բայց եթե Ադրբեջանը շարունակում է ապրել ցնորքներով և հայտարարում, որ Արցախն Ադրբեջանի կազմում լինելու պարագայում կապահովեն նրա անվտանգությունը, կամ ինքնակառավարման բարձր մակարդակ կունենա, ապա դա ցույց է տալիս, որ նրանց մոտ ամեն ինչ շարունակում է մնալ նույն կարծրատիպերի տիրույթում»,- ասաց Ա. Ղուլյանը:
ԱԺ նախագահը նշեց, որ անընդհատ ռազմական հռետորաբանությամբ հանդես եկող, աշխարհի ողջ հայությանը իրեն թշնամի հայտարարող և 2016 թվականի ապրիլին վայրագություններ կազմակերպող պետության ներկայացուցչի կողմից անվտանգության ապահովման մասին հայտարարությունն ուղղակի անլրջություն է:
Դավիթ ԱԲԱՂՅԱՆ
