Բերդի բժշկական կենտրոնի 93 աշխատողներ նամակ են ուղարկել վարչապետ Նիկոլ Փաշինյանին: Նրանք հայտնել են, որ 2017թ. հուլիսին այդ ԲԿ-ի տնօրեն է նշանակվել Արմեն Մարդանյանը: Այդ ժամանակ ԲԿ-ում մասնագետների խիստ պակաս կար, վիրաբուժական բաժանմունքը վիրաբույժի կարիք ուներ, թերապեւտիկ բաժանմունքը՝ թերապեւտի: ԲԿ-ն այդ ժամանակ շուրջ 10 միլիոն դրամի պարտքեր ուներ: Նամակում նշված է, որ Ա. Մարդանյանի տնօրեն նշանակվելուց հետո մեկ տարվա ընթացքում ԲԿ-ն համալրվեց 7 բժիշկ-մասնագետներով (2 վիրաբույժ, վիրահատող, քիթ-կոկորդ, ականջաբան, գինեկոլոգ, թերապեւտ, վնասվածքաբան): ԲԿ-ի նվիրված աշխատանքի արդյունքում պարտքերը մարվել են, 8 տարի հետո այդտեղ վերսկսվել են վիրահատությունները, մեկ տարում 240 վիրահատություն է կատարվել, ԲԿ-ի հանդեպ բնակչության վստահությունը վերականգնվել է: Ծախսերի կրճատման եւ մուտքերի ավելացման արդյունքում Բերդի ԲԿ-ն 2018 ֆինանսական տարին փակել է 18 միլիոն դրամ ազատ մնացորդով: «Տավուշտեքստիլ» ընկերության տնօրինության հետ համագործակցության արդյունքում այդ ընկերությունը ԲԿ-ին նվիրել է իմունոֆերմենտային անալիզատոր լաբորատորիա: Նամակում նշված է, որ Բերդի ԲԿ-ն մասնակցել է տարբեր ծարգրերի, բժիշկները վերապատրաստվել են, ԲԿ-ն ձեռք է բերել 3 նոր ռեոնիմոբիլ, առկա հին ռեոնիմոբիլները նորոգվել են:
2018թ. օգոստոսին ՀՀ առողջապահության նախարար Արսեն Թորոսյանը, այցելելով Բերդի ԲԿ եւ ծանոթանալով ցուցանիշներին, ԲԿ-ի աշխատանքը գերազանց է գնահատել, պաշտպանության փոխնախարարի կողմից ԲԿ-ի աշխատանքները գովասանքի են արժանացել: Նամակում ասվում է, որ ԲԿ-ի անձնակազմի հարգանքն ու վստահությունը վաստակած Արմեն Մարդանյանի` որպես ԲԿ-ի տնօրեն պաշտոնավարելը պաշտպանության նախարարությունը համարել է անհնարին, դա պայմանավորելով նրա պայմանագրային զինվորական բժիշկ լինելու հանգամանքով: ԲԿ-ի աշխատողները Նիկոլ Փաշինյանին խնդրել են հանձնարարել, որպեսզի լուծվի Արմեն Մարդանյանի հետագա պաշտոնավարման հարցը:
Երեկ մեզ զանգահարեցին Բերդի ԲԿ-ից եւ հայտնեցին, որ ԲԿ-ի 10 բժիշկներից 9-ը, ի նշան բողոքի, դուրս են գալիս աշխատանքից: ԲԿ-ի աշխատողներն իրազեկ են, որ 2 ամսից՝ մարտին իրենց ԲԿ-ն լուծարվելու է, միանալու է Բերդի զինվորական հոսպիտալին: Նրանք հավելեցին, որ Բերդի բժշկական կենտրոնի տնօրեն է նշանակվել Համլետ Ադամյանը, ով հունվարի 29-ին հանձնում-ընդունում է կատարելու:
Բերդի ԲԿ-ից ասացին, որ իրենց հուզող խնդրի մասին հայտնել են նաեւ Տավուշի մարզից ԱԺ պատգամավոր Սիփան Փաշինյանին:
Ոսկան ՍԱՐԳՍՅԱՆ
