Բաթումում ընթացող ծանրամարտի Եվրոպայի առաջնությունում Հայաստանն այսօր ոսկե մեդալի լուրջ հավակնություն ուներ ի դեմս 81 կգ քաշային Անդրանիկ Կարապետյանի:
Հայ ծանրորդը մրցավայր մեկնել էր հաղթելու վճռականությամբ ու ամեն բան հենց դրան էր տանում: Անդրանիկը իր թիմակից Ռաֆիկ Հարությունյանի հետ միասին, որը նույնպես հանդես է գալիս իր քաշային կարգում, հյուրանոցում կշռվել ու մեկնել է մրցման վայր: Սակայն այնտեղի կշեռքը ցույց է տվել, որ Անդրանիկը սահմանված քաշից մի փոքր ծանր է: Ի վերջո, մարզիկը չի տեղավորվել թույլատրելի քաշի մեջ ու զրկվել է մրցահարթակ ելնելու իրավունքից: Պայքարում մնացել է միայն Ռաֆիկ Հարությունյանը, որը երկամարտում ցույց տվեց 344 կգ (150 + 194 ) եւ զբաղեցրել 8-րդ տեղը:
Աշոտ ՀԱԿՈԲՅԱՆ
