Ազատ ոճի ըմբշամարտի Եվրոպայի նորընծա չեմպիոն Արսեն Հարությունյանն այսօր լրագրողների հետ հանդիպման ժամանակ ասաց, որ իր ամենահիշարժան գոտեմարտը Բուխարեստի մրցագորգում թերեւս եզրափակիչն էր: «Պարտվում էի 0:8, բայց կարողացա հետ բերել: Ամբողջ կյանքում այդ գոտեմարտը կհիշեմ: Հիշեցի, թե որքան եմ տանջվել մարզիչներիս հետ ու անպայման պետք է հաղթել: Չէի ցանկանում աշխատանքս ջուրը գցել: Այս առաջնությունում ուզում էի հոգնեցնել մրցակիցներիս եւ հետո իմ միավորները վաստակել: Բայց հաջորդ մրցմանը հնարավոր է՝ այլ տակտիկա ընտրեմ»,-ասաց նա:
Իսկ Վազգեն Թեւանյանի խոսքով ինքն իր երկու գոտեմարտերից էլ տպավորված չէ: «Երկրորդը պարտություն էր, իսկ առաջինը կարճ տեւեց: Ես չպետք է թույլ տայի, որ այդպես վերջանար: Վրիպումներս գիտեմ: Բայց կա պարտություն: Հաջորդ անգամ կփորձեմ ավելի լավ հանդես գալ»,-ասաց Վազգենը:
Աշոտ ՀԱԿՈԲՅԱՆ
