Արցախի նախագահ Բակո Սահակյանի խոսնակ Դավիթ Բաբայանը պնդում է, որ ինքը տեղեկություն չունի, թե ՊԲ սպաներին ցուցակագրել են, հրամանի տակ ստորագրել տվել, ըստ որի, նրանք այլեւս չեն մասնակցելու քաղաքական գործընթացներին:
Հիշեցնենք, որ ՊԲ նախկին հրամանատար Սամվել Բաբայանի գրասենյակն այսօր նման տեղեկություն է տարածել ու ՀՀ իշխանություններին էլ կոչ արել չդիմել անպատվաբեր քայլերի:
«Նման բան չկա, թե Հայաստանի իշխանության մատն է խառնված կամ չգիտեմ ինչ: Ես էլ եմ քաղաքական ուժի առաջնորդ, մենք ակտիվորեն քարոզարշավ ենք իրականացնում, ըստ օրենքի՝ բանակի, ոստիկանության, ազգային անվտանգության ծառայողները իրավունք չունեն անդամակցել քաղաքական ուժի, սա օրենքի պահանջ է: Նրանք կարող են քվեարկել, բայց մասնակցել քաղաքական գործընթացներին, անդամագրվել, ինչպես ասացի, չեն կարող օրենքի պահանջով ու վաղուց է այն աշխատում: Եթե բանակը կուսակցական է , արդեն լուրջ խնդիրներ է առաջացնում:
Կարծում եմ՝ դա է ճիշտը, ինչքան էլ ուզենայինք բանակը մասնակցի՝ հաշվի առնելով ծանոթների քանակը, պետք է պահպանենք օրենքի պահանջը, ես տեղեկություն չունեմ որեւէ լրացուցիչ հրամանի մասին, ձեզ ասացի այն կարգը, որը գոյություն ունի վաղուց: Սամվել Բաբայանին չեմ մեկնաբանի, ես դրա կարիքը չունեմ, իրենից հարցրեք՝ ինչու է էդ կոչն արել ու ինչու է նման բան հայտարարել »,- ասաց Դավիթ Բաբայանը: Ըստ նրա ժամանակին եղել է, որ Արցախի բանակը մասնակցել է քաղաքական գործընթացներին, բայց. «Եղել է ժամանակին, բայց մենք այդ փուլը, բարեբախտաբար, անցել ենք, դժվարությամբ, բայց անցել ենք»:
Կարդացեք նաև
Հիշեցնենք, որ 2020-ին Արցախը պատրաստվում է անցկացնել նախագահական ու խորհրդարանական ընտրություններ, մեր հարցին, թե նկատելի է, ում են սատարում ՀՀ իշխանությունները, պարոն Բաբայանը պատասխանեց. «Հայաստանի իշխանությունները Արցախում պետք է սատարեն բոլոր նրանց, ում սատարում է ժողովուրդը, որովհետեւ ՀՀ իշխանությունները չեն կարող որեւէ մեկին սատարել, նույնիսկ, եթե կան նախասիրություններ, քաղաքական գործընթացն այնպիսին է, որ Արցախի ժողովուրդը պետք է որոշի, երբեւիցե նման բան, միջամտություն չի էլ եղել, դա սխալ է»:
Արփինե ՍԻՄՈՆՅԱՆ
Հ. Գ. Այս հրապարակումից հետո Սամվել Բաբայանի գրասենյակից «Առավոտին» ուղարկել են ցուցակագրման, ստորագրության, ինչպես նաև հրամանի լուսանկարները:
