Սոչիում բնակվող գյումրեցի գործարար Գագիկ Պետրոսյանը, որն իր հայրենի քաղաքում դելֆինարիա է կառուցում, շաբաթ օրը Գյումրիում վարչապետ Նիկոլ Փաշինյանի ու կառավարության մյուս անդամների մասնակցությամբ տեղի ունեցած «Իմ քայլը հանուն Շիրակի մարզի» ներդրումային-գործարար համաժողովին բարձրաձայնեց պետական աջակցության անհրաժեշտության մասին։
Գործարարն իր հարցն ուղղեց Էկոնոմիկայի նախարար Տիգրան Խաչատրյանին՝ ասելով․ «Գյումրիում կան բիզնեսներ, որոնք առանց պետական աջակցության չեն աշխատում։ Ես քանի որ մեր առաջին հանդիպման ժամանակ խոստացել էի պարոն վարչապետին, կառուցել եմ դելֆինարիա։ 4 շաբաթից բերում ենք կենդանիներին, և Գյումրիում սկսում է աշխատել դելֆինարիան, սակայն Գյումրիում կան հարցեր, որոնք ծանր են նստում բիզնեսմենի աշխատանքի վրա․ քանի որ ձմեռվա ընթացքում այստեղ շատ ցուրտ է, մինչև մինուս 20-25 աստիճան է, ջրի և գազով տաքացման ծախսերի խնդիր կա․․․
Եկել եմ այն հարցին, թե Գյումրիում ինչո՞ւ չկա մի հատ լողավազան, մեծ քաղաք է, հանրապետության երկրորդ քաղաքն է, և չկա լողավազան։ Ո՞նց անենք, որ ջրի ու գազի տաքացման հարցը, եթե մեծ լողավազան է,թեթևացնենք, եթե այս հարցը չլուծվի, Գյումրին լողավազան չի ունենա։ Իմ խնդիրն այն է, որ ես ձմեռը պիտի տաքացնեմ այդ ջուրը, որը դելֆինների համար է, անհնար է սահմանված գնով տաքացնելը, ստիպված պիտի փակես ձմեռվա ընթացքում։ Ես ուզում եմ մեծ լողավազան կառուցել, բայց ի նկատի ունենաք, որ Գյումրին այն քաղաքը չէ, որ մարդիկ կարողանան վճարել, գան, լողանան, լողավազանն էլ չի լինի․․․»։
Էկոնոմիկայի նախարարը նկատեց, որ այն ուղիղ կապ ունի Գյումրիում զբոսաշրջության զարգացման հետ ու ասաց, որ քննարկելու հարց է։
Կարդացեք նաև
«Ես վստահ եմ, որ այն, ինչ դուք ասում եք, սկզբնական ժամանակահատվածի համար է այդպես, երկարաժամկետ գործունեության ընթացքում, երբ որ մենք էապես կունենաք աճ զբոսաշրջիկների, ովեքեր այցելում են, համապատասխան կառույցը կամ կազմակերպությունը, որը դուք նախատեսում եք ծրագրի շրջանակներում զարգացնել, կունենա ավելի շատ եկամուտներ, ավելի շատ ծառայություններ։ Քննարկելու հարց է, եկեք մենք միասին թվերով նայենք, որ հասկանանք կառավարության աջակցության չափն ինչքան պիտի լինի»,- ասաց նախարարը։
Նշենք, որ գործարարը բազմաթիվ բարեգործություններ է արել իր հայրենի քաղաքում․ նրա հանգանակությամբ վերանորոգվել է նաև Գյումրու Սուրբ Գրիգոր Լուսավորիչ եկեղեցին կամ ժողովրդի լեզվով ասած «Գեղցոնց ժամը», որի վերջին քահանան եղել է նրա պապը։ Ի դեպ, Գյումրու քաղաքապետարանից մեզ տեղեկացրեցին, որ գործարարը դելֆինարիան կառուցում է իրեն պատկանող տարածքում՝ նախկին կաթի գործարանի մոտակայքում է։
Նունե ԱՐԵՎՇԱՏՅԱՆ
