Օգոստոսի 31-ին մի խումբ լրագրողներ փորձեցին պիցցա ակրոբատիկա ներկայացնել, ժողովրդախոսակցական լեզվով ասած՝ պիցցայապար: Պիցցա ակրոբատիկայի ժամանակ խոհարարը պիցցայի խմորը գլխապտույտ արագությամբ պտտեցնում է օդում՝ մատների վարժ շարժումով: Դրանից պիցցան ավելի համեղ է ստացվում, թե ոչ, դժվար է ասել, բայց հնարքը իբրեւ պիցցայի պատրաստման բաղադրիչ, գեղեցիկ է:
Այս ամենը հնարավոր դարձավ «Երեմյան փրոջեքթս» խոհարարական արվեստի ու հյուրընկալության ակադեմիայի՝ ԶԼՄ ներկայացուցիչների համար նախատեսված ճանաչողական շրջայցի շրջանակներում: Շեֆ-խոհարար Սարգիս Առաքելյանի գլխավորությամբ խոհանոցի հրուշակագործության արտադրամասում լրագրողները մասնակցեցին պիցցայի պատրաստման՝ պիցցա ակրոբատիկայի էլեմենտներով դասին:
Կարդացեք նաև
Մանրամասն՝ տեսանյութում
Ավելի վաղ ակադեմիայի տնօրեն Նազելի Նավասարդյանը լրագրողներին ներկայացրել էր ակադեմիայի գործունեության նպատակները, ուսումնական ծրագրերը, դասավանդման մեթոդներն ու դասախոսական կազմին:
Ակադեմիայում նաեւ լրագրողներին փոքրիկ «փորձության» ենթարկեցին: «Համերի ճանաչում» ինտերակտիվ դասախոսություն-խաղի ժամանակ խոհարարական ծրագրերի ղեկավար Կարեն Խաչատրյանի ղեկավարությամբ առանց տեսողական, լսողական և հոտառական զգայարանների՝ լրագրողները փորձարկեցին տարբեր մթերքներ՝ արդյունքում պարզելով իրենց համային ընկալիչների զարգացածության աստիճանը:
Լրագրողները ներկա գտնվեցին նաեւ մատուցողների համար նախատեսված սպասարկման ծրագրերի «Արդյունավետ սպասարկում ռեստորանում» դասընթացին, որը վարում էր Մարգարիտա Խաչատրյանը: Ի թիվս այլնի, նա խոսեց նաեւ սպասքադրման նրբություններից: Անդրադարձ եղավ Տաջիկստանի նախագահի տված ընթրիքի ժամանակ ՀՀ վարչապետ Նիկոլ Փաշինյանի սեղանի ծայրին նստելու աղմուկ հանած նկարին: Մասնագետը պարզաբանեց, որ այդտեղ չպետք է ենթատեքստեր փնտրել, քանի որ կատարվածը սխալ սպասքադրման հետեւանք է: Նրա խոսքերով, սպասքադրման մեջ եւս պետք է պահպանել մաթեմատիկական ճշգրտությունը՝ նման դեպքերից խուսափելու համար:
Խոհարարական ծրագրերի ղեկավար Կարեն Խաչատրյանը ներկայացրեց sous vide տեխնոլոգիայով պատրաստված ուտեստի «մաստեր կլաս», իսկ ուսումնական մասի ավարտից հետո Ակադեմիայի «Լաբորատորիա» սրճարանում լրագրողները համտեսեցին ուսանողների պատրաստած պիցցան և շեֆ-հրուշակագործ Մարիամ Հովհաննիսյանի պատրաստած թխվածքաբլիթները: Հյուրերին սպասարկեցին ակադեմիայի ուսանողները:
Գոհար ՀԱԿՈԲՅԱՆ
