«Միջնորդություն ենք ներկայացրել այն մասին, որ ԶԼՄ ներկայացուցչին խոչընդոտելու հոդվածը բավարար չէ, որովհետեւ տեղի է ունեցել նաեւ խուլիգանություն: Ակնհայտ անհարգալից վերաբերմունք են դրսեւորել չորս անձինք, այսինքն՝ խմբակային գործողություն է տեղի ունեցել հանրային տարածքում»,-լրագրողների հետ հանդիպմանն այսօր անդրադառնալով օրերս «Հայելի» մամուլի ակումբի վրա հարձակման դեպքին, որի առթիվ քրեական գործ է հարուցվել, ասաց իրավապաշտպան, «Հայելի» ակումբի ղեկավար Անժելա Թովմասյանի շահերի ներկայացուցիչ Զարուհի Փոստանջյանը:
Նրա խոսքով՝ այդ դեպքի ժամանակ Անժելա Թովմասյանի նկատմամբ ընդգծված վերաբերմունք է դրսեւորվել առ այն, որ նա պատկանում է Թովմասյանների ընտանիքին. «Նրա եղբայրն այժմ ՍԴ նախագահ է: Այս ամենը պարունակում է նաեւ անձի հանդեպ խտրական վերաբերմունք: Միայն Անժելա Թովմասյանն է այս պահին ճանաչված տուժող, մինչդեռ տուժող պետք է ճանաչվեր նաեւ «Հայելի» մամուլի ակումբը՝ որպես իրավաբանական անձ:
Մեղադրանքի ծավալը եւս պետք է ավելացնել: Այդ երիտասարդները կասկածյալի կարգավիճակում են, բայց ակնկալում ենք, որ նրանց տրվի մեղադրյալի կարգավիճակ: Կարծում եմ՝ վարույթն իրականացնող մարմինը ոտքը կախ է գցել: Հավանաբար, սպասում է ինչ-որ ցուցումի»:
Զարուհի Փոստանջյանը պնդեց՝ այդ չորս երիտասարդներն ուղղորդված են եկել հանրային տարածք՝ այդպիսի գործողություններ կատարելու. «Համացանցից մենք ունենք տեղեկություն այդ երիտասարդներից մեկի վերաբերյալ: Լուսանկարում նա ողջագուրվում է Նիկոլ Փաշինյանի հետ: Մեկ այլ տեղ նա լուսանկարվել է «Իմ քայլը» խմբակցության անդամի հետ, Հայկ Մարությանի հետ: Չենք բացառում, որ սա ուղղորդված է գործադիր եւ օրենսդիր իշխանությունների կողմից»:
Կարդացեք նաև
Լուիզա ՍՈՒՔԻԱՍՅԱՆ
Ինչպիսի մետամարֆոզ…տիկին Զարուհի, եթե փորփրենք արխիվները, բազմաթիվ լուսանկարներ ու տեսանյութեր կգտնվեն Ձեր ոչ այնքան հեռավոր անցյալի գործունեությունից: Երևի մենք(Ձեզ համակրռղները) լավ չէինք ճանաչում Ձեզ: Խորին հիասթափություն ու նողկանք եմ զգում: