Ինչպես տեղեկացրել ենք, այսօր առողջապահության նախարարությունը ԱԺ էր բերել մի օրինագիծ, ըստ որի՝ ռազմական դրության ժամանակ առողջապահության նախարարությունը կկարողանա կառավարել ոչ միայն իր ենթակայության տակ գտնվող հիվանդանոցները, բուժհիմնարկները, այլեւ մասնավորները:
Սա տարաբնույթ մտահոգությունների տեղիք տվեց: Արման Բաբաջանյանը հետաքրքրվեց միասնական շտաբ ստեղծելու գաղափարը ե՞րբ է առաջացել, 2016-ի ապրիլյան պատերազմի ժամանակ դա դիտարկվե՞լ է ու եթե մասնավոր հիվանդանոցները ռազմական դրության ժամանակ եթե դառնում են շտաբի անդամ, այդ հիվանդանոցների ծախսերը պետությո՞ւնն է հոգում, թե՞ այդ ծախսերն էլ են մնում հիվանդանոցների վրա:
Առողջապահության փոխնախարար Լեւոն Հակոբյանը պատասխանեց, որ ծախսերի փոխհատուցում է լինելու կառավարությունից՝ սահմանված կարգով: Նա նաեւ ասաց, որ որեւէ շտաբ չի ձեւավորվում, պարզապես ամբողջ առողջապահական համակարգը ուղղաձիգ կառավարման է բերվում:
ԲՀԿ պատգամավոր Միքայել Մելքումյանը հարցրեց՝ առողջապահության նախարարը պետք է ունենա կառավարման լրացուցիչ լիազորություննե՞ր ռազմական դրության ժամանակ: Փոխնախարարը պատասխանեց, որ ռազմական դրության պլանով գերատեսչությունների պլանով այդ լիազորությունները ներկայացված են լինելու, բայց հիմա հանրային քննարկման ժամանակ չի բացի փակագծերը, թե ինչպես է իրականացվելու ռազմավարությունը:
Կարդացեք նաև
ԱԺ առողջապահության եւ սոցիալական հարցերի հանձնաժողովի նախագահ Նարեկ Զեյնալյանը փորձեց պատգամավորների մտահոգությունները փարատել՝ ասելով, որ ռազմական դրության ժամանակ տրամաբանական է, որ կառավարումը լինելու է մեկ կետից. «Բարդ է ընկալվում հարցը, քան իրականում կա: Այսօրվա դրությամբ որոշ բուժհիմնարկներ գործում են նախարարի անմիջական կառավարման ենթակայության տակ, մեծամասամբ բուժհիմնարկները մասնավոր են, ռազմական դրության ժամանակ հիվանդանոցների կառավարումը փոխանցվում է առողջապահության նախարարությանը, որպեսզի ճիշտ իրականացվի բուժսպասարկումը, բուժօգնությունը եւ կազմակերպվի զորահավաքային առաջադրանքը: Այս պահին որոշ մասնավոր բուժհիմնարկներ անում են սա»:
Սասուն Միքայելյանը հարցրեց. «Ես ուզում եմ հասկանամ, պատերազմական ժամանակաշրջանում մենք էս գլխից ամրագրում ենք, որ առողջապահության նախարա՞րն է դառնալու ընդհանուր ղեկավարը ամբողջ մարտական գործողությունների՝ վերադասավորում, առաջին գծի օգնություն, որ հիվանդանոց, այդ վերաբաշխումը առողջապահության նախարարի վրա՞ է, նա ենթարկվո՞ւմ է հոսպիտալին, թե՞ հակառակը: Մարտական դրության ժամանակ բոլորին պետք է ղեկավարի բանակը»:
Լեւոն Հակոբյանը պատասխանեց. «Պաշտպանության նախարարության ամբողջ գործառույթը՝ սկսած խրամատից, առաջնագծից, բոլոր օղակներով մինչեւ հոսպիտալային օղակ արվելու է եւ իրականացվելու է ՊՆ ռազմաբժշկական վարչության եւ հոսպիտալային օղակի միջոցով: Դրանից հետո թիկունքային օղակը, առողջապահական ողջ համակարգը բուժելու, նեղ մասնագիտական, շտապ, անհետաձգելի դեպքերը կատարելու, խաղաղ բնակչության առողջությունն ապահովելու, իսկ ռազմականացված կոնտինգենտին արագ շարք վերադարձնելու գործառույթն իրականցվելու է քաղաքացիական առողջապահական համակարգի միջոցով: Հստակ տարանջատումը ոնց կա, կարգավորումից հետո ոչինչ չի փոխվում»:
Հռիփսիմե ՋԵԲԵՋՅԱՆ
