Այսօր ԱԺ-ում առողջապահության նախարար Արսեն Թորոսյանին խնդրեցինք մանկահասակ երեխայի՝ ՄԻԱՎ-ով վարակվելու դեպքի հետ կապված փակագծերը բացել, քանի որ մինչ այդ կցկտուր տեղեկություններ էին հրապարակվել:
Հիշեցնենք, որ հոկտեմբերի 16-ին ոստիկանության Արաբկիրի բաժնում ստացվել է քաղաքացու՝ ՀՀ գլխավոր դատախազին հասցեագրված դիմումն այն մասին, որ 2019թ. օգոստոսի կեսերից մինչև հոկտեմբերի 11-ն ընկած ժամանակահատվածում անչափահաս թոռնուհին ստացիոնար բուժման մեջ է գտնվել «Արաբկիր» բժշկական կենտրոնում, որտեղ վերջինիս մոտ հայտնաբերվել է ՄԻԱՎ, որով երեխան մինչ այդ վարակված չի եղել: Նախնական տվյալներով՝ երեխան ամիսներ շարունակ պարբերաբար ջերմել է եւ 2019թ. օգոստոսի 20-ին տեղափոխվել «Արաբկիր» ԲԿ:
Նախարարը պատասխանեց. «Փակագծերը կբացի հավանաբար քննությունը, դրանից ավելի ինֆորմացիա չեմ կարող տրամադրել: Ունենք ցավալի դեպք, երեխայի մոտ հայտնաբերվել է ՄԻԱՎ վարակ, նա բուժում է ստանում, փորձում ենք առողջությունը վերականգնել, որպեսզի կյանքին վտանգ չսպառնա»:
Նա ասաց, որ իրեն հայտնի չէ, թե որ բուժկենտրոնում է հիվանդացել երեխան. «Եթե իմանայինք, ամեն ինչ պարզ կլիներ եւ քննության կարիք չէր լինի: Երեխան բազմաթիվ բժշկական կենտրոններում բուժում է ստացել: Հնարավոր է, որ դա բժշկական կենտրոնում էլ տեղի ունեցած չլինի: Հաստատվել է միայն, որ ծնողները չունեն ՄԻԱՎ վարակ: Կարող է կենցաղային պայմաններում է վարակվել, ոչ ծնողներից»:
Կարդացեք նաև
Հարցրեցինք, թե կոնկրետ ո՞ր բժշկական կենտրոններում է եղել երեխան, Արսեն Թորոսյանը պատասխանեց, որ ողջ ցանկն անգիր չի կարող ասել, հետո դա ոչինչ չի տալու:
Հռիփսիմե ՋԵԲԵՋՅԱՆ
