Միջինարեւելյան այս աղցանը վաղուց արդեն ընդունված եւ սիրված է հայկական խոհանոցում: Թեեւ ինչպես սննդի օբյեկտներում, այնպես էլ հայաստանցի տանտիրուհիների պատրաստած թաբուլեն այնքան էլ նման չէ իր օրիգինալ տարբերակին, քանի որ չափից դուրս շատ բլղուր եւ տոմատի մածուկ է պարունակում:
Այս տարբերակը, որ առաջարկում եմ, ավելի նման է բնօրինակին, միայն թե ես ավելացնում եմ հոնի անկորիզ չիր (կամ՝ լոռամրգի չիր, կամ չորացրած բարբարիս), ինչը չկա բաղադրատոմսում, սակայն, վստահեցնում եմ, շատ համեղ է ստացվում:
Անհրաժեշտ մթերքները
Խառը կանաչի- 1 կապ
Կարդացեք նաև
Թարմ անանուխ (նանա)- 10 ճյուղ
Կանաչ սոխ- 10 ճյուղ
Լոլիկ- 2 հատ խոշոր
Վարունգ-2 հատ
Մանր բլղուր- 1-1,5 ճաշի գդալ
Համեմունքներ (աղ, սեւ եւ կարմիր պղպեղ, սումախ)- ըստ ճաշակի
Ձիթապտղի յուղ- 4 ճաշի գդալ
Կիտրոն-1 հատ
Հոնի անկորիզ չիր-1 ճաշի գդալ (կարող եք փոխարինել նույնքան չորացրած բարբարիսով կամ լոռամրգի չրով, կամ կարող եք ընդհանրապես չգցել, եթե չունեք առաջարկածս տարբերակներից որեւէ մեկը)
Պատրաստման եղանակը
Կանաչիները եւ բանջարեղենները շատ լավ լվանալ, չորացնել: Հոնի չիրն ու բլղուրը նույնպես լվանալ: Այս երկուսն էլ լվանալու համար բավական է լցնել փոքրիկ ցանցի մեջ եւ մեկ րոպեով պահել հոսող սառը ջրի տակ:
Լոլիկն ու վարունգը կտրատել մանր խորանարդաձեւ: Սոխը, անանուխը եւ խառը կանաչին շատ մանր կտրատել: Կիտրոնը լվալ, մանր քերիչով կեղեւը քերել (միայն դեղին մասը, տակի սպիտակ թաղանթին չհասնեք, այլապես շատ դառը կլինի), ապա մեջտեղից կիսել եւ երկու կտորներից էլ հյութն ամբողջությամբ հանել:
Աղցանամանի մեջ լցնել մանրացրած կանաչին, կտրատած բանջարեղենը, կիտրոնի քերած կեղեւը, կիտրոնի հյութը, բլղուրը, հոնի չիրը, համեմունքները, ձիթայուղը: Լավ խառնել, համտեսեք, եթե կարիք ունի հավելյալ ձիթայուղի կամ աղի, ավելացրեք:
Կարող եք մատուցել ոչ միայն աղցանամանի մեջ լցրած, այլեւ՝ հազարի տերեւների մեջ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
