«Լավ տրամադրությամբ ենք տարին փակում, կա փոխհամաձայնություն օրակարգի բոլոր հարցերի շուրջ. սա լավ նշան է, լավ մթնոլորտ է, որ համաձայնություն կա բոլոր հարցերի շուրջ»,- Սանկտ Պետերբուրգում մեկնարկած ԵԱՏՄ բարձրագույն խորհրդի նեղ կազմով նիստի ժամանակ հայտարարեց ՀՀ վարչապետ Նիկոլ Փաշինյանը` առաջարկելով ժամանակ չկորցնել եւ անմիջապես անցնել փաստաթղթերի ստորագրմանը:
Ինչպես արդեն տեղեկացրել ենք, Սանկտ-Պետերբուրգում, Բորիս Ելցինի անվան նախագահական գրադարանում, այսօր տեղի է ունենում Եվրասիական տնտեսական միության բարձրագույն տնտեսական խորհրդի հերթական նիստը: Նիստը սկսվեց նախատեսվածից մոտ երկու ժամ ուշացումով: ԵԱՏՄ թե՛ նեղ, թե՛ ընդլայնված կազմերով նիստերին մասնակցում է նաեւ Ղազախստանի նախկին նախագահ Նուրսուլթան Նազարբաեւը: Նա ԵԱՏՄ-ի ստեղծման գաղափարակիրներից է:
Հայաստանի նախագահության չորս տարիները ԵԱՏՄ-ում, ՀՀ վարչապետ Նիկոլ Փաշինյանը, կարծում է՝ դրական էին: Նաեւ կարծում է, որ «այդ ոգով կշարունակենք մեր հետագա համագործակցությունը»:
Մինչ Նիկոլ Փաշինյանի ելույթը, ՌԴ նախագահ Վլադիմիր Պուտինն իր ողջույնի խոսքում վստահություն հայտնեց, որ նախատոնական հանդիպումն արդյունավետ կլինի` հետագա պայմանավորվածությունների մասով:
Կարդացեք նաև
Երբ Բելառուսի նախագահ Ալեքսանդր Լուկաշենկոն սկսեց խոսել` ՀՀ վարչապետ Նիկոլ Փաշինյանն ընդհատեց նրան, մոռացել էր շնորհավորել Բելառուսի` ԵԱՏՄ-ում նախագահությունը ստանձնելու առիթով:
Ալեքսանդր Լուկաշենկոն էլ դրական գնահատեց Հայաստանի նախագահության շրջանը ԵԱՏՄ-ում, եւ նախագահող կազմի չորս տարիների աշխատանքը: Ասաց` կարծում է` բոլորի տպավորությունն է փոխանցում:
Ի դեպ, ԵԱՏՄ-ում նախագահությամբ Բելառուսը կհամակարգի տեխնիկական հարցեր, ՌԴ-ի համակարգման ոլորտում կմնան առեւտրային հարցերը, տնտեսական որոշ ոլորտներ կմնան Հայաստանի համակարգման ներքո:
Նիստի օրակարգում 12 հարց էր, որոնք նախապես համաձայնեցված էին եւ շատ արագ ստորագրվեցին, նիստի աշխատանքներն էլ բավականին կարճ տեւեցին:
Այլ մանրամասները`տեսանյութում:
Հայաստանը ԵԱՏՄ-ում նախագահությունը փոխանցեց Բելառուսին
Gepostet von Aravot am Freitag, 20. Dezember 2019
Եվրասիական բարձրագույն տնտեսական խորհրդի հաջորդ նիստը կկայանա 2020-ի մայիսին, Մինսկում:
Օրակարգային հարցերի ստորագրման արարողությունից հետո ՌԴ նախագահը Եվրասիական տնտեսական հանձնաժողովի կոլեգիայի նախագահ Տիգրան Սարգսյանին պարգեւատրեց Բարեկամության շքանշանով` ԵԱՏՄ-ի աշխատանքներում անձնական մեծ ներդրման համար: Վլադիմիր Պուտինն ընդգծեց, որ Տիգրան Սարգսյանը ԵԱՏՄ-ում «բավական լավ աշխատանքային մթնոլորտ է ստեղծել»՝ թեժ քննարկումները կառուցողական եւ համընդհանուր համաձայնության հուն տեղափոխելով:
Նելլի ԳՐԻԳՈՐՅԱՆ
Սանկտ Պետերբուրգ
