Առաջարկում եմ խոզաճարպի պատրաստման երկու եղանակ, երկու տարբերակով էլ շատ համեղ է ստացվում: Ընդ որում, խոզաճարպը կարող եք գնել ինչպես արդեն կտորների բաժանած, մշակման պատրաստ վիճակում՝ շուկայից կամ սուպերմարկետներից, այնպես էլ ինքներդ կարող եք այն առանձնացնել Ամանորի համար նախատեսված խոզի ազդրից: Ես, օրինակ, հենց այդպես եմ արել:
Անհրաժեշտ մթերքները
Տարբերակ 1
Խոզի ճարպ- 500-600 գրամ
Կարդացեք նաև
Սխտոր-3-4 պճեղ
Ծովի խոշոր աղ, սեւ եւ կարմիր աղացած պղպեղ
Դափնու տերեւ-2 հատ
Տարբերակ 2
Խոզի ճարպ-500-600 գրամ
Սխտոր- 4-5 պճեղ
Աղ- 200 գրամ
Ջուր-1լ
Հատիկով սեւ եւ բուրավետ պղպեղ, համեմի սերմ, չորացրած չիլի, դափնու տերեւ եւ այլ համեմունքներ՝ ձեր ճաշակով
Պատրաստման եղանակը
Տարբերակ 1
Խոզաճարպի վրայից դանակով քերել վրայի շերտը: Բաժանել մոտավորապես ձեռքի ափի չափ կամ ավելի փոքր կտորների: Յուրաքանչյուր կտորի վրա կտրվածք անել 3/4 խորությամբ: Այդ կտրվածքների մեջ դնել սխտորի բարակ շերտեր, դափնու տերեւի կտորներ: Ապա յուրաքանչյուր կտորը շատ մանրամասն պատել ծովի խոշոր աղով, սեւ եւ կարմիր պղպեղով: Խոզաճարպը կկլանի ճիշտ այնքան աղ, որքան պետք է:
Ապակյա տարայի հատակին լցնել աղ, համեմունքներ, խոզաճարպի կտորները տեղավորել տարայի մեջ, ծածկել պոլիէթիլենային թաղանթով, վրայից դնել որեւէ ծանրություն: Ես, օրինակ, օգտագործում եմ գլաքարեր: Թողնել սենյակային ջերմաստիճանում 4-5 օր, ապա յուրաքանչյուր կտորը թափ տալ, ազատել ավելորդ աղից, փաթաթել յուղաթղթի մեջ, դնել սառցախցիկ առնվազն 1 օրով, որից հետո կարելի է կտրել եւ մատուցել:
Այս տարբերակով պատրաստված խոզաճարպը սառցախցիկում կարող եք պահել 1-2 ամիս:
Տարբերակ 2
Այս տարբերակով պատրաստելու համար պետք է աղաջուր սարքել: Կաթսայի մեջ լցնել ջուրը, աղը, ամբողջական սեւ եւ բուրավետ պղպեղները, դափնու տերեւը, չորացրած չիլի պղպեղը՝ եթե ունեք, կարելի է ավելացնել համեմի, սամիթի, մանանեխի չաղացած սերմեր: Թողնել ջուրը եռա, կրակը ցածրացնել, թողնել մոտ 10 րոպե շարունակի եփվելը:
Մինչ այդ խոզաճարպի կտորները կտրատել այնպիսի կտորների, որ հեշտությամբ տեղավորվեն ապակյա բանկայի մեջ: Շարել բանկայի մեջ՝ առանց սեղմելու: Կտորների արանքներում դնել կտրատած սխտոր, դափնու տերեւ, համեմունքներ:
Աղաջուրը տաք-տաք լցնել խոզաճարպի վրա՝ բոլոր համեմունքների հետ միասին: Որպեսզի կտորները վերեւ չթռնեն, վրան ծանրություն դնել: Թողնել սենյակային ջերմաստիճանում 2-3 օր, ապա սառնարանում՝ 3 օր: Հանել աղաջրից, թղթե անձեռոցիկով լավ չորացնել: Թաթախել սեւ ու կարմիր աղացած պղպեղի մեջ, փաթաթել յուղաթղթով, դնել սառցախցիկ: Մեկ օր անց կարող եք մատուցել:
Այս տարբերակով պատրաստված խոզաճարպը մինչեւ վեց ամիս կարող եք սառցախցիկում պահել:
Ձախից՝ տարբերակ 1-ով պատրաստված խոզաճարպն է, աջից՝ տարբերակ 2-ով պատրաստվածը:
Խոզաճարպը կարող եք մատուցել սեւ հացի, մանանեխի կամ ծովաբողկի, թթու կամ մարինացված վարունգի եւ իհարկե՝ մի բաժակ սառը օղու հետ: Բարի ախորժակ:
Պատրաստեց Մելանյա ԲԱՐՍԵՂՅԱՆԸ
