Ովքե՞ր են Սիսիանի ավագանու ընտրություններում «Քաղաքացիական պայմանագրի» թեկնածուները․ «Հանուն Հանրապետության» Նախշուն Յազուլյանը եւս դարձել է կառավարող ուժի անդամ

Սիսիանի ավագանու ընտրություններում առաջադրված «Քաղաքացիական պայմանագիր» կուսակցության ընտրացուցակում, ինչպես արդեն տեղեկացրել ենք, ընդգրկված է 63 թեկնածու, որոնցից 61-ը կառավարող ուժի անդամ են, իսկ երկուսը՝ անկուսակցական։

2022թ.-ի սեպտեմբերի 25-ին կայացած ընտրություններում ներկայացրած ընտրացուցակից «Քաղաքացիական պայմանագրի» ցուցակը չնայած էապես չի տարբերվում, բայց կան նոր անուններ։ Այսպես, ցուցակի առաջին եռյակը նույնն է մնացել։ Այն գլխավորում է Սիսիան համայնքի ղեկավարի պաշտոնակատար, ՔՊ-ական, 41-ամյա Արմեն Հակոբջանյանը։

Արմեն Հակոբջանյան

Նրան հաջորդում են ոչ մի տեղ չաշխատող, անկուսակցական Արմենակ Միրզախանյանն ու Սիսիանի բժշկական կենտրոնի տնօրեն, ՔՊ-ական Անիկ Գրիգորյանը։

Կարդացեք նաև

Արմեն Աշոտյան. «Հաշվի առնելով, որ Նիկոլը լայնածավալ հարձակում է իրականացնում մեր ինքնության դեմ, եկեղեցին ունի և իրացնում է իր իրավունքը պաշտպանել այն»

• 18:11 27.04.2024

Նիկոլ Փաշինյանը հանդես է եկել Հայաստանի և Ադրբեջանի միջև սահմանազատման գործընթացի մեկնարկի մասին զեկույցով

• 23:07 25.04.2024

Անգամ Միջազգային քրեական դատարանի կամ տրիբունալի կողմից ցեղասպանություն որակված դեպքերում զոհերի վերաբերյալ ամբողջական տեղեկություններ չկան. Civilnet

• 16:07 25.04.2024

Անիկ Գրիգորյան

4-րդ հորիզոնականի թեկնածուն նույնպես անփոփոխ է մնացել՝ Սիսիանի փոխհամայնքապետ Կարեն Հովհաննիսյան։

Կարեն Հովհաննիսյան

Ցուցակի երկրորդ անկուսակցական թեկնածուն՝  Գորայք համայնքի նախկին ղեկավար Աշոտ Աղաջանյանն է, որը կառավարող ուժի ընտրացուցակի 5-րդ հորիզոնականում է։ Համայնքների խոշորացման ծրագրի հերթական փուլով՝ Գորայք համայնքն  անցած տարի միացավ Սիսիան համայնքին։  Նախորդ ընտրացուցակում՝ 5-րդ համարի ներքո «Ջերմուկ Ինթերնեշնլ ՊԵՊՍԻ-ԿՈԼԱ» շուկայի զարգացման պատասխանատու Հովսեփ Առաքելյանն այս անգամ 7-րդ հորիզոնականում է։ Սիսիանի թիվ 1 հիմնական դպրոցի տնօրեն Անահիտ Գեւորգյանն այս անգամ ցուցակի 15-րդ հորիզոնականում է՝ նախորդ 12-րդ հորիզոնականի փոխարեն։

Աշոտ Աղաջանյան

Իսկ դպրոցի տնօրենը 12-րդ հորիզոնականը զիջել է թիվ 3 հիմնական դպրոցի ուսուցչուհի Նախշուն Յազուլյանին։ Վերջինիս անունը հայտնի դարձավ 2022թ.-ի հոկտեմբերի 12-ին կայացած Սիսիանի նորընտիր ավագանու առաջին նիստում, երբ նա խառնեց բոլոր խաղաթղթերը՝ քվեարկելով ՔՊ-ական Արմեն Հակոբջանյանի օգտին, ու վերջինս ընտրվեց համայնքի ղեկավար։

Նախշուն Յազուլյան

Այդ ժամանակ Նախշուն Յազուլյանը մանդատ էր ստացել Արման Բաբաջանյանի «Հանուն Հանրապետության» կուսակցությունից։ Տիկին Յազուլյանը նախորդ ընտրություններում «Հանուն Հանրապետության» ընտրացուցակի 3-րդ հորիզոնականում էր։ Եվս մեկ հետաքրքիր փաստ․ 2022թ-ի հոկտեմբերին Նախշուն Յազուլյանը «Հանուն Հանրապետության» կուսակցության անդամ էր, իսկ հիմա պարզվում է՝ անդամակցում է «Քաղաքացիական պայմանագրին»։ Ի դեպ, «Հանուն Հանրապետության» ցուցակում Նախշուն Յազուլյանի աշխատավայրը նշված էր Սիսիանի ավագ դպրոց, այս անգամ՝ թիվ 3 դպրոցի ուսուցչուհի։

Տիգրան Համբարձումյան

Կառավարող ուժի ընտրացուցակում է նաեւ Ազգային ժողովի պատգամավոր Կարեն Համբարձումյանի հարազատ եղբայրը՝ Տիգրան Համբարձումյանը։  Վերջինս «Հայանտառ»-ի Սիսիանի մասնաճյուղի տնօրենն է եւ ցուցակի 14-րդ հորիզոնականում է։ Բացի Սիսիանի թիվ 1 դպրոցի տնօրենից, «Քաղաքացիական պայմանագրի» ընտրացուցակում են նաեւ Սիսիանի թիվ 2 հիմնական դպրոցի, Անգեղակոթի, Սպանդարյանի, Նորավանի, Բնունիսի, Ույծի, Աղիտուի, Բռնակոթի, Ախլաթյանի դպրոցների տնօրենները։

Ցուցակի 61-րդ հորիզոնականում Սիսիանի մյուս փոխհամայնքապետն է՝ Գարիկ Հակոբյանը, որը նախորդ անգամ 32-րդ հորիզոնականում էր։

Բացի «Քաղաքացիական պայմանագրից», Սիսիան համայնքի ավագանու ընտրություններում առաջադրվել են «Քաղաքացու որոշում» սոցիալ-դեմոկրատական եւ Հայաստանի Հանրապետական կուսակցությունները։ Այդ կուսակցությունների ընտրացուցակներին  կանդրադառնանք առաջիկայում։

Տիգրան Համբարձումյանի լուսանկարը՝ նրա ֆեյսբուքյան էջից։

Արմեն ԴԱՎԹՅԱՆ