ՀՀ-ԵՄ համապարփակ եւ ընդլայնված գործընկերության համաձայնագրի իրականացման գործընթացի վերաբերյալ մշտադիտարկում կիրականացնեն քաղհասարակության կազմակերպությունները: Մասնավորաբար, Հելսինկյան քաղաքացիական ասամբլեայի Վանաձորի գրասենյակը, Թրանսփարենսի ինթերնեյշնլ հակակոռուպցիոն կենտրոնը, Ժուռնալիստների «Ասպարեզ» ակումբը, Իրազեկ քաղաքացիների միավորում ՀԿ-ն, Խտրականության դեմ պայքարի ու հավասարության կոալիցիան, Հայաստանի Հելսինկյան կոմիտեն, Իրավունքի զարգացման եւ պաշտպանության հիմնադրամը, Իրավունքների պաշտպանություն առանց սահմանների ՀԿ-ն, Գլոբալիզացիայի եւ տարածաշրջանային համագործակցության վերլուծական կենտրոնը եւ Ընդդեմ կանանց նկատմամբ բռնության ՀԿ-ն: Ծրագիրն իրականացնում է Բաց հասարակության հիմնադրամներ-Հայաստանը` Վրաստանում եւ Հայաստանում Նիդերլանդների թագավորության դեսպանության աջակցությամբ:
Ծրագիրը երկամյա է, նպատակն է` Հայաստան-ԵՄ ՀԸԳՀ-ի պատշաճ իրականացումը`քաղհասարակության մշտադիտարկման եւ ջատագովության միջոցով:
ԲՀՀ Հայաստանի գործադիր տնօրեն Լարիսա Մինասյանի ներկայացմամբ, ՀԳԸՄ նշանակությունը հեղափոխությունց հետո կտրուկ մեծացել է եւ մտավախություններ, որ այն կարող է մանիպուլացվել, չկան: Լարիսա Մինասյանը հիշեց, որ մինչ հեղափոխությունը, բազմաթիվ բարեփոխումներ մանիպուլացվել են գործող իշխանությունների կողմից:
Նրա համոզմամբ, այժմ համաձայնագիրը կարող է ծառայել իբրեւ ճանապարհային քարտեզ` երկրի ժողովրդավարական, համապարփակ եւ համակարգային վերափոխման համար: Համաձայնագրի իրականացման վերահսկողության գործում քաղհասարակության դերը Լարիսա Մինասյանն անփոխարինելի է համարում: Նա կարծում է, որ այսպիսով ավելի արդյունավետ կդառնա ՀՀ կառավարության, ԵՄ-ի եւ քաղհասարակության միջեւ երկխոսությունը:
Կարդացեք նաև
Այլ մանրամասները` տեսանյութում:
Նելլի ԳՐԻԳՈՐՅԱՆ
