ՀՀ ԱԺ ԲՀԿ խմբակցության պատգամավոր Միքայել Մելքումյանի կարծիքով՝ Հայոց ցեղասպանության զոհերի հուշահամալիր այցելությունների հետ կապված որոշումն արարողակարգային է, ուստի առանձնապես մեկնաբանման կարիք չկա:
Aravot.am-ի հիշեցմանը՝ կուսակցությունների բազում ներկայացուցիչներ հարցնում են՝ ինչո՞ւ պետք է մարզպետները, Երևանի քաղաքապետը, Սփյուռքի հանձնակատարը հնարավորություն ունենային իրենց հարգանքի տուրքը մատուցել Հայոց ցեղասպանության զոհերի հուշահամալիրում, իսկ կուսակցությունների ներկայացուցիչները՝ ոչ և հարցին՝ ինքն ի՞նչ կարծիք ունի այս մասով, Միքայել Մելքումյանն արձագանքեց. «Ընդհանրապես ամեն որոշման մեջ որոշակի տրամաբանություն պիտի լինի: Ես չեմ հետաքրքրվել, թե ինչ սկզբունքով են կայացրել այդ որոշումը, բայց արժեր, որ խորհրդարանի հիմնական քաղաքական ուժերը և այլ հայտնի քաղաքական ուժեր գնայինք Ծիծեռնակաբերդ, բայց ԲՀԿ-ն իր հարգանքի տուրքն իրականացրել է մոմավառությամբ՝ ապրիլի 23-ին՝ Նուբարաշենի Սուրբ Նահատակաց եկեղեցում, որը կառուցվել է Գագիկ Ծառուկյանի միջոցներով»:
Անդրադառնալով այն փաստին, որ մարզպետներն այցելել են հուշահամալիր, պատգամավորն ասաց. «Հարցը տեղին է, թե ինչու մարզպետներն այցելել են, իսկ խորհրդարանականները՝ ոչ, չէ՞ որ նրանք տարածքային իշխանության ներկայացուցիչներ են, խորհրդարանականները՝ օրենսդիր, բայց այդ հարցն ուղղված է պարետատանը: Մարզպետները տարածքային իշխանության մասն են կազմում, ինչո՞ւ նրանց ներկայությունը պետք է լիներ, իսկ խորհրդարանական ուժերի ներկայացուցիչներինը կամ ԱԺ հանձնաժողովների ներկայացուցիչներինը՝ թեկուզ մեկ-երկու հոգով չլիներ։ Հարցը տեղին եմ համարում, բայց սահմանափակումներ կայացնողներին պետք է հղել»:
Տաթև ՀԱՐՈՒԹՅՈՒՆՅԱՆ
