Առողջապահության նախարարն այսօր այցելել է «Սուրբ Գրիգոր Լուսավորիչ բժշկական կենտրոն», որը վերապրոֆիլավորվել է կորոնավիրուսային հիվանդության դեմ պայքարի բժշկական կենտրոնի եւ փաստացի ամենամեծ բուժկենտրոնն է: Այստեղ են գտնվում ամենաշատ թվով ծանր հիվանդները, որոնց մոտ հայտնաբերվել է կորոնավիրուս:
Ուղիղ եթերում Արսեն Թորոսյանը մտավ վերակենդանացման բաժանմունք, տեղեկացավ հիվանդների մասին: Բուժանձնակազմը տեղեկացրեց, որ օրեր առաջ ստիպված են եղել բժշկական ցուցումով հղիություն ընդհատել: Արսեն Թորոսյանը, հիվանդների մասին տեղեկություններ ստանալուց հետո ասաց. «Տեսանք բազմաթիվ ծանր, ծայրահեղ ծանր պացիենտների, որոնցից ոմանց մոտ դժբախտաբար դրական դինամիկա չկար: Շատերի մոտ կա դրական դինամիկա՝ շնորհիվ բժիշկների: Նրանք հետո կտեղափոխվեն բժշկական բաժանմունքներ ու դուրս կգրվեն: Տեսնում եք, որ բժիշկներն այս հանդերձանքներով աշխատում են օրուգիշեր, շատ դաժան աշխատանքային պայմաններ են, բայց այլ տարբերակ չկա պաշտպանելու մեր բուժաշխատողների առողջությունը: Մենք պետք է շնորհակալ լինենք նրանց՝ այս ծանր աշխատանքը կատարելու համար»:
Արսեն Թորոսյանն ասաց, որ վերակենդանացման բաժանմունքից հետո կլինի նաեւ սովորական բաժանմունքներում. «Ցույց կտանք նաեւ նկարներ պացիենտներից»:
Հռիփսիմե ՋԵԲԵՋՅԱՆ
