«Զարմանքս պետք է արտահայտեմ այն կապակցությամբ, որ Արամ Վարդեւանյանը վիրավորվում է միջնորդության մեջ հնչած «գիծը պահել» արտահայտությունից: Բառարանում առնվազն ներկայացված է, թե ինչ է նշանակում գիծը պահել, նշանակում է մոտեցումը շարունակել, մոտեցումը պահել: Այստեղ խրոխտ ներկայացվում է, թե ինչպե՞ս կարող են պաշտպանության կողմին ասել, թե գիծը պահում են: Գրիչի գիծը չենք ասում պահում են: Եթե այդ արտահայտությունից վիրավորվում են, Ալումյանն ասում էր՝ եթե այստեղ չհասկացող մարդիկ կան, 4 անգամ կասեմ»,- այսօր սահմանադրական կարգի տապալման գործի քննության ժամանակ ասաց մեղադրող դատախազ Գեւորգ Բաղդասարյանը:
Ըստ նրա, դատական նիստը տապալելու դասական օրինակ են այսօրվա շատ պաշտպանների ելույթները, մասնավորապես, նա նշեց Կարեն Մեժլումյանի ելույթը՝ որպես իրավունքի չարաշահման դասական օրինակ:
Ինչ վերաբերում է այն դիտարկումներին, որ ԱԺ «Իմ քայլը» խմբակցության պատգամավոր Անդրանիկ Քոչարյանի ցուցումից հետո է դատախազը միջնորդություն ներկայացրել նիստերն անհարկի ձգձգելու, իրավունքի չարաշահման մասին՝ Բաղդասարյանն ասաց, որ իրենք բազմիցս են խոսել այդ մասին ու առաջին անգամ չէ, որ դրա մասին ասում են:
Արամ Վարդեւանյանն էլ ասաց, որ կարող են իրենց դիրքորոշումն արտահայտել 10 րոպեում, կամ կես ժամում ու կարող են օրենքով չարգելած բոլոր միջոցներով պաշտպանության իրավունքն իրացնել:
Կարդացեք նաև
Դատախազ Կարեն Բիշարյանը պնդեց իրենց միջնորդությունը՝ անցնելու դատաքննության փուլ:
Դատավոր Աննա Դանիբեկյանը որոշեց մեղադրողների միջնորդությունը մերժել: Հաջորդ դատական նիստը նշանակվեց հուլիսի 14-ին, ժամը 13-ին:
Նիստից հետո լրագրողների հետ զրույցում Արամ Վարդեւանյանն ասաց, որ Քրեական դատավարության օրենսգրքում այդպիսի գործիքակազմ չկա, որ զրկեն իրենց միջնորդություններ ներկայացնելուց. «Մենք այս ժամանակահատվածում ուսումնասիրել ենք նաեւ միջազգային փորձը: Չեք գտնի այնպիսի երկիր, որը նման գործիքակազմ ունի ու փառք Աստծո, որ այսօր նման նախադեպ չեղավ նաեւ Հայաստանում: Բայց մենք փաստացի 2 դատական նիստ կորցրել ենք այս միջնորդության վրա»:
Հռիփսիմե ՋԵԲԵՋՅԱՆ
