Նորամարգի միջնակարգ դպրոցի տնօրենի ընտրությունները երկու անգամ տապալվել են, համայնքի բնակիչները դրա մեջ միտում են տեսնում: Նրանք կարծում են, որ մարզպետարանի ներկայացուցիչը հատուկ չի ներկայանում մրցույթին, որ կարողանան «անցկացնել» իրենց ցանկալի թեկնածուին:
Նորամարգի դպրոցի ներկայացուցիչները հերթական անգամ բողոքով հանդես եկան նաեւ ՀՀ կառավարության շենքի առաջ: Կառավարությունից նրանց պատասխանեցին, որ պետք է դեռ որոշում կայացվի, խոստացան՝ վերջնական պատասխանի դեպքում ցուցարարներին տեղեկացնել:
Նորամարգցիները մտահոգ էին: Նրանցից մեկը հետաքրքրվեց. «Փաշինյանը եւ Ավինյանը տեղյա՞կ են լինելու այս ամենից, որովհետեւ բողոքը նրանց է հասցեագրված»: Պատասխանեցին, որ ամեն դեպքում իրավասու անձինք են զբաղվում խնդրով: «Ուզում եմ տեղեկացնեք իրենց, որ եթե անարդարություն լինի, մենք մինչեւ վերջ պայքարելու ենք»,-զգուշացրեց ցուցարար կանանցից մեկը:
Ապա լրագրողներին հայտնեց, որ արդեն չորրորդ-հինգերորդ հանդիպումն է կայանում, ու ամեն անգամ հիասթափվում են՝ չստանալով իրենց բավարարող պատասխան: «Հիմա, եթե այս պահին չկա պատասխան, երեւի իրենք հասկացել են, որ մենք խիստ ենք տրամադրված, հույս ունենանք, որ լավ կլինի, այլապես մենք մինչեւ Եվրոդատարան կգնանք, որովհետեւ աշակերտների եւ ուսուցիչների արցունքները հնարավոր չէ մոռանալ»,-ասաց նա:
Կարդացեք նաև
Հիշեցնենք, որ մրցույթին մասնակցում են դպրոցի նախկին տնօրեն, գյուղի բնակչուհի Ծովինար Գալստյանը և ևս երկու հավակնորդ Մասիս քաղաքից՝ Գոհար Սահակյանն ու Գեւորգ Մինասյանը:
Գոհար ՀԱԿՈԲՅԱՆ
