Նախնական տեղեկություններով՝ երեկ երեկոյան պապի կողմից դաժան ծեծի ենթարկված 4 եւ 6 ամյա երեխաները Տավուշի մարզի Խաշթառակ համայնքից են: Թեեւ լուրեր են տարածվել, որ պապն է ծեծի ենթարկել, գյուղում կասկածում են երեխաների հորաքրոջը, որն, ըստ գյուղապետի, ամուսնալուծված է, բազմազավակ մայր ու մտավոր խնդիրներ ունի:
Գյուղապետ Անդրանիկ Վիրաբյանը Aravot.am-ի հետ զրույցում պատմեց, որ երեխաների մայրը հոգեկան առողջության հետ կապված խնդիրներ ունի, այս պահին բուժում է ստանում բուժհաստատությունում, երեխաների հայրը՝ մտավոր խնդիրներ ունի: Ըստ Անդրանիկ Վիրաբյանի՝ երեխաների հիմնական խնամքը պապի ու տատի վրա է, որոնք առողջ են. «Պապն այնքան խեղճ մարդ է, ինքը չէր կարող ծեծել: Առավոտյան երեխաների տատիկն է զանգել, խնդրել՝ մի բան անեք, որ ամուսնուն բաց թողնեն ոստիկանությունից, ինքը, իրոք, չէր կարող ծեծել երեխաներին, հետը խոսեք, կհասկանաք»:
Գյուղապետի խոսքով, ինքը հստակ չի կարող ասել, բայց չի բացառվում, որ հորաքույրը ծեծած լինի, պապին իր վրա վերցրած լինի: Դեպքի մանրամասներին գյուղապետը չի տիրապետում:
Նա վերջում հավելեց, որ ծեծված երեխաներին մի անգամ համայնքապետարանի միջամտությամբ տարել էին մանկատուն, բայց հորաքույրը գնացել, հետ էր բերել, երեւի, որ խնամքի նպաստից չկտրվի:
Կարդացեք նաև
Երեխաներից մեկն այս պահին ծայրահեղ ծանր վիճակում է, ըստ գյուղապետի՝ վնասվածքը գլխի շրջանում է, պետք է վիրահատվի:
Արփինե ՍԻՄՈՆՅԱՆ
